香港特別行政區 訴 梁舒麒
|
HCCC259/2008 香港特別行政區 高等法院 原訟法庭 刑事案件 2008 年第 259 號 ------------------
----------------------
判刑 官：被告承認一項販運危險藥物罪，違反香港法例第134章《危險藥物條例》第4（1）（a）及（3）條。 本情指，警員喺被告正在離開升降機嘅時候，截停佢，進行搜身。喺佢嘅褲袋內搜獲一個用紙巾包裹住嘅危險藥物。被告喺警誡之下，承認替人運送毒品賺取200元。 毒品經化驗之後，證實係12.85克晶狀固體，內含11.72克甲基苯丙胺鹽酸鹽，當時市值係8,750元。 被告現年40歲，共有四項嘅刑事紀錄，全與毒品無關。 大律師指，被告兄弟姊妹眾多，一早已經遷出自住，留連遊戲機中心，認識損友，沾上毒癮，今次亦都係因為畀人誘使先至會鋌而走險干犯本案，今次尚未賺取到金錢已經被捕。 大律師指，根據佢嘅案底嚟講，今次係第一次被告干犯販運危險藥物嘅案件。另外，根據被告自己撰寫嘅求情信，被告亦都表示係因為衝動、愚昧、不顧後果而犯案，現在已經深感後悔，誓必痛改前非，希望法庭能夠網開一面予以輕判，讓佢能夠早日獲釋，克盡孝道照顧年邁嘅母親。 本席喺量刑嘅時候考慮咗本案嘅案情、毒品嘅種類、重量以及量刑指引、被告認罪，考慮咗大律師嘅求情，亦都閱讀咗被告所撰寫嘅求情信。本案嘅毒品係「冰」毒，根據量刑指引，10至到70克販運嘅起刑點係7至10年。就本案嘅11.72克嘅「冰」毒，本席認為7年嘅起刑點係適合嘅，予以三分之一嘅認罪扣減，判刑四年八個月。 |