香港特別行政區 訴 蕭文晞

HCCC276/2008

香港特別行政區

高等法院

原訟法庭

刑事案件 2008 年第 276 號

----------------------

----------------------

判刑
以下內容乃法庭數碼錄音謄本

官：被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，被告被警員截查，發現喺佢手持嘅膠袋內有兩個載有晶狀物體嘅紙盒。被告承認毒品係「K仔」，以及佢指毒品係供佢個人服用。毒品經過化驗之後，證實為992.41克粉末內含832.50克氯胺酮。毒品總數量當時嘅零售價為港幣十二萬六千多元。

被告現年27歲，共有三項嘅刑事紀錄，其中一項喺2001年因為管有危險藥物被判感化令，其後喺2002年亦都進入過戒毒所。

大律師喺求情嘅時候表示，被告喺中四輟學之後做過廚房學徒，其後喺廚房擔任工作。但係2001年開始染上毒癮，喺2002年戒毒所獲釋之後與一名內地嘅女子結婚，並且移居國內，開設時裝店。去年因為經濟不景而結業，佢需要返香港，只能夠尋獲到廚房嘅散工工作。今次犯案係因為認識咗損友，再次沾上毒癮，喺損友唆擺之下先至鋌而走險。但係收取咗毒品回家等候指示，尚未收取有人答應支付嗰2,000元，途中已經被拘捕。大律師指，被告年紀尚輕，坦白認罪，希望本席能夠予一個較低嘅起刑點。

本席喺量刑嘅時候，考慮咗本案嘅案情、毒品嘅種類、重量、以及新嘅量刑指引、被告認罪同埋大律師嘅求情，亦都閱讀咗被告撰寫嘅求情信。被告喺信內表示，因為一時貪念，干犯本案，深感後悔，愧對父母同埋妻子，並指會喺獄中進修，不會虛耗光陰。

本案發生係喺許守城案新嘅量刑指引頒發日期之後，根據新嘅案例，指引係販運600至到1,000克嘅氯胺酮，起刑點由12年至14年。就本案嘅832.50克氯胺酮，本席採納13年嘅起刑點。予以三分之一嘅量刑扣減，判刑八年零八個月，即係104個月。