香港特別行政區 訴 陳義海及另一人
|
HCCC51/2009 香港特別行政區 高等法院 原訟法庭 刑事案件2009年第51號 ----------------------
---------------------- 主審法官： 彭偉昌暫委法官 日期： 2009年4月1日上午10時04分
控罪：販運危險藥物等罪項（Trafficking in a dangerous drug, etc.） 判刑 官：被告一同二都曾經喺裁判法院各自承認過一項販運危險藥物罪，分別為控罪一（即係內含967.07克N,N-DMA及91.99克「冰」嘅1,330.35克固體）及控罪二（即內含964.06克N,N-DMA及92.12克「冰」嘅1,321.10克嘅固體），而家交由我懲處。 情節方面，好簡單嘅啫，就係警方喺機場離境大堂發現呢兩名被告可疑，將佢哋截停，搜身之下，發現佢哋身上藏有有關嘅毒品。喺警誡下，被告一同二都承認為錢替人將毒品從深圳經香港帶去新西蘭。 背景方面，被告一今年23歲，大陸出生，曾經讀書至中三，之後做過幾份藍領嘅工作，被捕時住喺深圳，冇刑事定罪紀錄。求情時，律師指佢係因為欠債而犯下本案，而家則後悔不已。 另外，被告二今年45歲，香港出生及受教育至中三程度，之後做過同樣係幾份藍領嘅工作，由07年開始失業，被捕嗰時候只有散工可做，住喺黃大仙區。最後，佢有七次共十五項刑事定罪紀錄，不過全部同毒品無關。求情時，律師亦指佢係因為經濟壓力而犯案。 量刑方面，據我嘅認知，N,N-DMA基本上都係稀釋嘅作用居多，講得明白啲，就係提高毒品嘅份量，以增加利錢，所以我喺拿捏有關嘅量刑基準嗰時，會以涉案「冰」毒嘅凈含毒量為基礎，再因應整體嘅毒品數量作適量嘅調節。因為再寬大，亦唔能夠脫離N,N-DMA本身就係毒品呢個事實，再加上本案係跨境販運，所以喺判刑上一定要有所反映。如是者，我會將兩名被告嘅量刑起點都定喺12年，佢哋認罪，可以得到三分一嘅扣減，就下調至8年，不過之後就再冇減刑嘅理由。 我宣判，兩名被告須各自為自己嘅控罪入獄8年。 申請上訴許可被駁回。請參閱 CACC140/2010 日期: 2010年12月20日 |