香港特別行政區 訴 梁紹康
|
HCCC148/2009 香港特別行政區 高等法院 原訟法庭 刑事案件2009年第148號 ----------------------
---------------------- 主審法官： 高等法院暫委法官潘敏琦 日期： 2009年6月29日上午9時48分
控罪： 販運危險藥物（Trafficking in a dangerous drug） --------------------------------------- 判刑 ------------------------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，警員搜查一個單位嘅時候，發現單位內有一個上咗鎖嘅小型保險箱，一盒內有大約100個可再封口膠袋嘅紙盒、一個電子磅，而被告係有該保險箱嘅鎖匙。保險箱開啟之後，警員發現內有20個可再封口嘅膠袋，載住內含177.84克氯胺酮嘅258.74克固體。被告承認毒品係屬於佢嘅，而該單位係佢嘅朋友，而朋友批准佢將毒品放置喺單位內，佢會向佢啲朋友提供氯胺酮服用。有關嘅毒品總數量，當時嘅零售價係港幣32,601元。 被告現在22歲，犯案嘅時候只得21歲，未婚，過往並冇刑事紀錄，同家人同住。大律師喺求情嘅時候指，被告今次係愚蠢地喺不知案件嘅嚴重性而犯案，而佢係家中最年幼嘅，由於家人溺愛縱容，疏於管教，佢先至會誤交損友，誤入歧途，干犯本案。而被告嘅求情信亦都指佢今次已經深切反省，佢喺出獄後會洗心革面，改過自新。家人亦都指被告本性不壞，能孝順父母，家人喺佢被捕後仍然對佢不離不棄。 本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪同埋大律師嘅求情，亦都閱讀咗被告以及佢家人所撰寫嘅求情信。本案係發生喺許守城案件新量刑指引頒發日期之後，根據新指引，販運50至到300克嘅氯胺酮，起刑點由6年至到9年。就本案所牽涉嘅177.84克氯胺酮，本席採納七年半嘅起刑點，予以三分之一嘅認罪扣減，判刑5年。 |