香港特別行政區 訴 陳愛薇
|
HCCC85/2009 香港特別行政區 高等法院 原訟法庭 刑事案件2009年第85號 ----------------
----------------
-------------------------------------------- 判刑 -------------------------------------------- 官： 被告承認兩項販運危險藥物罪，違反香港法例第134章《危險藥物條例》第4（1）（a）及（3）條。 案情指，被告被關員截查，從佢嘅褲袋發現5包白色嘅粉末，化驗之後，證實為內含0.78克海洛英鹽酸鹽嘅1.17克混合劑。其後，關員押解佢返去佢住所搜查，而喺住所內搜獲1,696包毒品以及染有毒品嘅錫紙、包裝工具（包括包裹物料、電子磅、錘同埋剪刀），而單位內嘅毒品，經過化驗之後，證實為407.53克混合劑，內含276.98克海洛英鹽酸鹽。被告喺警誡下，承認該些白色粉末係白粉，屬佢所有，而上述所有嘅危險藥物市值約三十二萬多元。 被告現年37歲，根據大律師講，佢與家人已經超過十年不相往來。佢喺干犯本案之前，曾經有十五次一共二十項嘅刑事紀錄，多與毒品有關。最後一次係喺1999年11月3日，因為管有危險藥物罪，被判監禁6個月。 大律師求情嘅時候表示，被告育有一名8歲嘅兒子，本來由佢獨力照顧，而家由於佢入獄，所以只有係托管喺他人處。另外，大律師指，被告人自92年開始以綜援維生，而佢自20歲開始已經染上毒癮，今次犯案主要係希望多賺啲錢，提供比較舒適嘅生活予兒子而鋌而走險。另外，大律師又指，被告人今次坦白認罪，彰顯悔意，亦都力陳佢最後一次犯事已經係約十多年前，希望本席能夠考慮各方面有利於被告嘅因素，予以一個較低嘅起刑點，或者格外開恩，予以最大嘅量刑扣減。 本席喺量刑嘅時候，考慮咗本案嘅案情、毒品嘅重量、種類以及有關嘅量刑指引、被告承認控罪、大律師嘅求情，亦都閱讀咗所有呈交由被告以及佢兒子撰寫嘅求情信件。根據量刑指引，販運海洛英鹽酸鹽重量200至400克，起刑點係12至15年。本案兩項控罪所涉嘅毒品，總重量係277.76克，本席考慮所有嘅因素之後，認為13年嘅起刑點係適合嘅。予以三分之一嘅量刑扣減，總刑期係八年零八個月，分配如下： 第一項控罪，判刑兩年；第二項控罪，判刑八年八個月。同期執行。 |