香港特別行政區 訴 莫良
|
HCCC37/2009 香港特別行政區 高等法院 原訟法庭 刑事案件2009年第37號 ---------------- 香港特別行政區 訴 莫良 ----------------
------------------------------------- 判刑 ------------------------------------- 官： 被告承認公訴書上面嘅三項猥褻侵犯（即係控罪一、二同四），另一項意圖搶劫而襲擊他人（即係控罪三）就經控方申請，留置本案嘅卷宗，冇法庭嘅命令，唔能夠再行起訴。 總括而言，控罪一同二係一宗獨立事件，涉及一名女事主；控罪四又係另一宗獨立事件，涉及另一名女事主。前者發生喺04年10月，後者發生喺07年9月，亦即係三年之後。兩案發生嘅時候，都係夜晚。 情節方面，可以睇番控方讀出嘅案情撮要。 簡單講，就係18歲嘅女事主喺公廁如廁後，被被告用鐵鉗威脅，令佢屈服，替被告喺旁邊嘅公園手淫，期間被告仲伸手入事主嘅衣服，搋捏佢嘅乳房，同時又迫令事主吻佢（即係被告）嘅乳頭。如是者，折騰咗十分鐘，被告先鬆開事主嘅手，走埋一邊射精，跟住用樹葉清潔，呢個就係控罪一。 至於控罪二，就係佢意猶未盡，唔畀事主離開，坐喺旁邊，喺衣服入面摸同埋抓佢嘅乳房，期間被告又企又坐，試圖問出事主嘅地址同電話號碼。 最後，控罪四嘅事主26歲，事發時喺行人天橋突然畀被告撚頸，逼佢轉身，然後再從背後伸手入佢裙底，隔住內褲，撫摸佢下體。女事主反抗，被告就打佢背脊，逼佢埋牆，伸手入佢衣服，摸佢胸部，然後再將佢嘅T裇扯低，用脷（舌頭）去舔佢乳房。之後，被告仲捉住事主雙手，逼佢同自己手淫，不過最後冇射精就離開。經檢驗之後，女事主被發覺背脊同頸項有多處紅斑及頸項同胸壁挫傷，但係毋須留醫。 至於警方點樣破案，就係喺控罪四嘅現場搵到被告嘅指紋，然後根據刑事紀錄，去佢舊嘅地址，將佢拘獲。此外，無論係控罪一、二定係控罪四嘅證物，都搵到被告嘅基因。 最後，背景方面，被告即將56歲，喺香港出生，並受教育至小六程度，之後做過製衣工人同司機，被捕時係一所運輸公司嘅東主。此外，佢離咗婚，有兩名已經成年嘅子女，案發時則與母親同住。最後，佢有四次共八項前科，其中五項係猥褻侵犯，日期係1972同74年，分別被判打藤同埋即時監禁18個月，同期執行。 求情嗰時候，被告話對自己嘅行為好後悔，又提到自己喺婚姻同工作上嘅困難同埋母親同自己嘅健康狀況，希望法庭可以輕判。同樣，被告向感化官同心理學家透露，本案兩宗事件發生前，佢都喺工作上承受住巨大嘅壓力，而且都飲過酒，所以先喺冇預謀嘅情況下，一時衝動，犯下有關嘅罪行。然而，根據心理學家嘅分析，被告為人孤獨，控制情緒嘅能力薄弱，而且會因為犯罪帶嚟嘅操控感同埋性刺激得到滿足，反之對自己嘅問題又缺乏認識，所以重犯同類型案件嘅風險極高，所謂extremely high，強力建議被告要接受情緒管理同人際關係等等方面嘅輔導同治療。 我喺考慮過所有嘅因素後，認為控罪一、二、四嘅量刑基準應依次為四年、兩年同四年半。被告認罪，可以得到三分一嘅扣減，就下調至兩年零八個月、一年零四個月同三年。此外，控罪一同二源出於同一事件，刑期應該同期執行，不過控罪四嘅刑期就應該分期執行，反正呢個結果亦唔會違反「數罪並罰，不能過重」嘅原則。 我宣判，被告需要為本案一共入獄五年零八個月，期間要喺獄中接受相關嘅心理治療。 |