香港特別行政區 訴 黃國恩

HCCC89/2009

香港特別行政區

高等法院

原訟法庭

刑事案件2009年第89號

----------------

----------------

-------------------------------------------

判刑

以下內容乃法庭數碼錄音謄本

--------------------------------------------

官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。

根據案情，警員睇到被告攞住一個白色膠袋從一個單位步出，神色慌張。警員截查，從個白色膠袋搜獲兩個紙包飲品盒，每盒各載有三包危險藥物。有關嘅毒品經過化驗之後，證實為139.59克混合劑，內含130克海洛英，市值大約八萬九千元。被告聲稱其中一盒係替人運送，另外一盒自用，但係佢喺今日亦都向本席承認所有嘅毒品均作販運用途。

被告現年40歲，共有四次共五項嘅刑事紀錄，其中有三項係涉及販運危險藥物，最後一次嘅刑事紀錄喺2005年5月13日，因兩項嘅販運危險藥物罪，共判六年零六個月嘅監禁。佢喺2008年8月28日從喜靈洲懲教所出獄，本案係佢出獄之後四個月干犯嘅。

大律師喺求情嘅時候表示，被告作為釋囚，搵工作係異常困難，曾經做過地盤工人，後來因為開工不足遭解僱，經濟陷入困境，捉襟見肘，因為意志薄弱，先至為咗數千元鋌而走險，干犯本案，令女友蒙羞，現已深感後悔，故此第一時間認罪，彰顯悔意。被告喺佢親手所寫嘅求情信內亦都表示，喺獄中會積極進修，希望有機會回饋社會。

本席喺量刑嘅時候，考慮咗本案嘅案情、毒品嘅種類、重量以及量刑指引、被告認罪以及大律師嘅求情，亦都閱讀咗被告所撰寫嘅求情信。根據量刑指引，販運海洛英鹽酸鹽重量50至到200克，起刑點係8至到12年。就本案所涉嘅130克嘅海洛英鹽酸鹽而言，本席認為10年嘅起刑點係適合嘅，予以三分之一認罪嘅扣減。雖然被告喺求情信所述令人同情，但係上訴庭已經多番表明，經濟情況犯案並不構成認罪以外額外扣減嘅因素。判刑80個月。