香港特別行政區 訴 葉嘉文

DCCC179/2009

香港特別行政區

區域法院

刑事案件2009年第179號

----------------

----------------

----------------

判刑理由書

----------------

1.第二被告今次所犯嘅控罪係相當嚴重，根據呢個上訴庭嘅判刑指引，簡單嚟講，一般刑期都要坐監，同埋起碼要坐3年監。根據你個毒品份量，判刑起點由3年至7年，咁個份量就其實啱啱6.60克一半，當然喇，就唔係純粹因為你嘅重量一半，就應該係3至7中間點落墨，咁亦都要考慮其他因素，又要考慮到你所扮演嘅角色，即係一般傳遞嘅角色，正如控罪個名詞，協助毒品流通，一手交一手，唔係同類個案件特別嚴重嘅，亦都冇證據顯示你都係受幕後策劃人嘅主使嘅啫。

2.法庭亦都考慮到你大律師所講嘅，最主要因素就係啱啱判咗監，放咗監出嚟，再立足社會係比較困難，咁係因為你因為種種理由，放棄重新正式投入社會，繼續做番老本行犯法嘅嘢，咁呢啲都唔係特別求情因素。

3.根據案情嘅嚴重性，同埋你家庭背景各樣，同埋你嘅販毒方式，同埋所扮演角色等等，法庭認為量刑起點應該喺5年。正如你律師所講，你係認罪，雖然證據確鑿，但係因為你認罪，因為法庭一定要畀呢個--最低限度都要畀三分之一嘅減刑，所以你唔需要多謝本席，因為呢三分一就係案例規定嘅，唔係我--唔係法庭可以自由減少唔畀三分一，或者用任何理由減少你應得呢三分一嘅減刑。

4.所以照計係60個月減三分一，即係減幾多？即係判你40個月，40個月坐監。