香港特別行政區 訴 黃綺雯

DCCC179/2009

香港特別行政區

區域法院

刑事案件2009年第179號

----------------

----------------

----------------

判刑理由書

----------------

1.法庭接納妳係一個值得輕判嘅人士，首先由於妳自己嘅成長過程，有好多不幸嘅。法庭亦都接納妳有六年嘅毒癮，好多時啲毒犯就只有講少，唔會講多嘅，如果講到佢吸毒嘅年份，好少人自認就有六年咁多嘅，法庭亦都相信妳冇六年，都係差唔多㗎喇，唔係妳自己都唔會承認有六年。好彩，身體上就已經冇咗呢個毒癮，可能妳律師講得啱，仲有心癮，妳亦都係年輕。

2.上訴庭無數案件都係重申一個原則，同情就歸同情，重判還要重判，因為呢啲係毒品案，呢啲求情因素對於減刑嚟講，所起嘅作用唔係好大。判刑指引，為方便起計嘅啫，背後嘅邏輯喺邊度呢，有理都說不清，本席亦都冇興趣作詳細研究。

3.承如妳嘅律師所指，「冰」毒少過10克就3年至7年，好多人都係用毒品嘅數量咁樣成直線比例計，咁就最方便。本席亦都認為，法庭如果純粹用呢個方法計呢，亦都係逃避責任。最主要法庭認為，要睇個情形，睇下根本妳呢一個販毒嘅方法、個情節，妳所擔任嘅角色有幾嚴重。

4.當然，妳律師都指出，妳都冇得益嘅。法庭可以暫時岔開話題，唔知妳喺邊度得到靈感，妳最大嘅求情理由就係妳最初認為警察威逼利誘妳自己所講嘅嘢，嗰啲就係妳最大嘅求情理由，睇妳嗰個理由係由一個被告攞咗「白粉」，唔係拎去再賣，即係唔係幫呢個更加罪大惡極嘅毒犯，幫佢手，妳係幫個下線，幫呢個所謂阿Dee，當然亦都係唔啱嘅，起碼阿Dee嘅母親、父親有可能怪責妳，「阿Dee就好冇膽嘅，唔係妳幫佢呢，佢可能買唔到『白粉』，就唔會食」，可能會咁講。

5.但係姑勿論點講，始終妳嗰個販毒個角色係冇咁嚴重，如果妳係代表另外一方送貨畀阿Dee呢，個睇法完全唔同。因為阿Dee佢自己安排晒毒品嘅，只不過係利用妳減輕佢自己（阿Dee）被捕嘅機會，因為阿Dee又唔係毒犯，如果阿Dee係毒犯，妳嘅罪責就唔會輕喇，妳係出於一種幫人又好，或者希望有些少著數又好，乜都好，但係始終妳所幫嘅就唔係幫毒犯，係幫最終嘅消費者，最終，咁可以講妳個情節係特別輕嘅。

6.舉個例，假如妳同呢個阿Dee同居，有人送貨去門口，佢懶起床，嗌妳去遞畀佢，妳去門口接咗之後，拎番入房，喺張床，咁妳照計嚟講都係販毒。咁倒番轉頭，妳唔係行出房門，行出去口攞，個情節嚴重少少喇，但係都係差唔多啫。今次妳就比較又嚴重啲，就坐埋電單車跨區或者去到好遠先攞，所以令到係咁嚴重。當然喇，如果妳去到深圳攞，去到過境，帶住包「白粉」過移民局，過海關，咁就罪大惡極，無論妳係同消費者帶又好抑或同販毒嘅人帶都係咁嚴重。

7.但係今次照妳自己所講嘅情節，法庭亦都係相信妳嘅情節，係可以講話係販毒嘅最輕嘅一種，唔係同毒犯做嘢，只不過係同個吸毒嘅人去攞「白粉」，唔係減輕毒犯畀人拉呀，係減輕吸毒者畀人拉嘅機會，所以我認為法庭嘅量刑起點可以去到最輕，3年。

8.至於妳認罪，的確係浪費咗法庭些少時間，但最主要都係免咗法庭裁決嘅工作，亦都可能令公眾比較安心啲，因為妳認罪就一定冇錯判呢回事，可能三分一減刑係反映呢個事實，唔係凈係反映慳法庭嘅時間，所以法庭照畀三分一，所以判妳第一條罪兩年監禁；第二條罪6個月監禁，同期執行。