香港特別行政區 訴 蔣健明
|
DCCC561/2009 香港特別行政區 區域法院 刑事案件2009年第561號 ----------------
----------------
---------------- 判刑理由書 ---------------- 1.代表你嘅律師正確指出咗法庭喺量刑起點係受上訴庭判刑指引束縛，法庭考慮過你嘅律師所講，關於案情方面，呢一類嘅犯案形式唔係最嚴重，而你所自認扮演嘅角色亦都唔係最嚴重一種，所以，本席認為個量刑起點就應該接近最低嗰部分，應該係5年。 2.其他求情因素，除咗你係認罪，我睇唔到你有咩嘢其他求情因素，你想改過自新，我諗你都唔係第一次有咁嘅意願。姑勿論點都好，法庭就唔會阻止你改過自新，法庭亦都唔相信，判你輕啲會幫助你改過自新，法庭亦都睇唔到有咩嘢邏輯，量刑輕啲就更加令到你可以有機會改過自新。 3.至於你家庭困難嗰方面，呢個求情理由，我相信就算你冇用過，法庭都考慮過㗎喇，喺以往你啲判刑嗰度，即係好似一張鈔票，你用咗就應該冇㗎喇，唔可以繼續用，10鈫買完嘢，又有10鈫，又用，下次上到法庭又用。而家你個女8歲，遲啲出番嚟咁十零歲，你又犯事，咁你又話個女十零歲，在學，你又要支持。你自己應該知道，你嘅家庭背景係點呢？喺犯案前同埋以前被判刑前都係冇乜點改過，唔可以重複重複用一個求情理由，就算可以，呢類案件亦都係不構成求情理由。 4.唯一只有一個可以減刑嘅理由，就係你認罪，呢方面，法庭亦都冇酌情權，起碼一定要畀你三分之一，喺呢個案件方面亦都係適合。好多時，我認為如果你係能節省警方調查嘅人力或者幫助到警方，咁法庭都會畀多啲，但法庭睇到你根本有好多方面可以有減刑嘅機會，你自己都唔珍惜，你如--法庭如果你有提供消息，邊個嗌你去買，你應該話畀我聽，當然係有一定嘅困難，提供你所謂害你嗰個朋友。其實佢害你，但係你同佢講佢可能會提供你就業機會，畀機會你賺500鈫。姑勿論點都好，法庭係明白，明白，有實際困難就向警方透露呢個人物，但係唔能夠否認嘅事實，你自己都唔珍惜額外嘅減刑機會，呢啲你係咎由自取，咁法庭只係得番一個求情理由嘅啫，就係認罪，可以減三分一嘅刑期。 5.咁所以就係普通計數方法喇，起點60個月，減番三分一，減20，所以法庭而家判你就係40個月監禁。
|