香港特別行政區 訴 曾亮誌

DCCC781/2009

香港特別行政區

區域法院

刑事案件2009年第781號

----------------

----------------

----------------

判刑理由書

----------------

1.入屋行竊罪係好嚴重，侵犯人哋嘅私隱，任何人都有權認為自己嘅住所係安全，一般嘅量刑起點係3年，除非係有特別嘅求情因素，雖然你係年青，但係你亦都係一個成年人。呢啲咁簡單嘅，啱抑或唔啱，是與非應該好清楚，唔可以話畀警察拉咗，先知道自己做錯。呢個求情藉口好多律師都係咁講，可能係被告人嘅指示，其實對佢絕大不利，如果要畀警察拉到先知錯，根本個人就未知道錯。

2.當你一係拎條鎖匙去配或者用任何方式得到鎖匙嗰陣時，就應該知道係錯，你係處心積慮，你因為利用呢個僱主僱用你嘅機會，知道晒啲財物嘅狀況，係典型嘅背信棄義嘅做法。一般嚟講，就令到件案件係更加嚴重，應該量刑起點有可能多過3年，但係平衡番你嘅年輕，我亦都接納你律師所講，你母親對你太過寵愛，冇適當嘅、嚴厲嘅管教，令到你誤入岐途。法庭亦都考慮到，呢件案令到你媽媽好傷心，但係判刑起點，法庭認為，一加一減都應該係3年係量刑起點。

3.法庭睇唔到有任何其他因素再可以減呢個量刑起點，唯一一個再有求情因素就係因為上訴庭嘅指引，逢係向法庭認罪，姑勿論證據係強弱多少，都要畀呢個三分一嘅寬免，所以法庭判你兩年監禁。