香港特別行政區 訴 麥浩鋌
|
DCCC974/2009 香港特別行政區 區域法院 刑事案件2009年第974號 ----------------
----------------
---------------- 判刑理由書 ---------------- 1.短話就不能長說，你判刑就好簡單，正如你律師所講，冇任何求情理由，除咗係認罪同埋的確有悔意，因為第一時間同警察認咗係販毒，咁你個自招供詞亦都出現喺案情嗰度，如果警察唔接納你個自招供詞，就唔應該擺喺度添。 2.律師應該有講畀你聽，呢個有判刑指引嘅，你如果唔記得嘅話，我可以再重複一次，就係如果純粹根據呢個數量，就係6年至9年。當然判刑指引雖然唔係硬性規定，但係要超出呢個指引，就係要有特別好強烈嘅環境因素、求情理由，喺你嗰度就冇嘅，咁所以一定係6年至9年。法庭當然認為，除咗睇下份量之後，就睇下你個販毒嘅方式等等其他因素、睇你被補嘅環境同埋睇你所招認嘅。你只係一個好低層次嘅販毒者，今次亦都係你第一次被判販毒嘅罪名，咁所以法庭認為可以採納最低嘅量刑起點，就係6年。 3.我頭先未講，而家講畀你聽，就係逢係向法庭認罪，第一時間向法庭認罪，上訴庭，可以咁講，係硬性規定要畀三分一呢個寬免嘅，所以而家我畀三分一寬免你，你千祈唔好多謝我。無論證據強弱，就算證據好強，你承認販毒，好多人睇到你販毒，你去法庭認罪，從前嚟講，法庭未必一定要畀任何寬免你嘅，但係而家上訴庭就已經個指引好清楚㗎喇，好硬性規定，一定要畀三分一，咁所以我解釋畀你聽，唔需要客氣，唔需要感謝本席。因為喺呢一個有咁嘅規定，咁變咗有一個問題喇，如果有兩個被告人，一個就同警察講，由頭至尾都唔認嘅，嚟到法庭先認嘅，如果嗰個同你一樣只係得三分一減免，我認為就變咗係好唔公道，起碼另外嗰個被告同警察合作，起碼部分合作，承認自己販毒。所以我認為，除咗呢三分一減免，起碼都應該有象徵式，就純粹因為你係同警察承認咗個販毒，咁亦都點樣講都好，起碼有部分，慳咗部分警察嘅部分時間，唔係慳好多，警察可能都係要做好多跟進工作，但係起碼最基本嘅就係，同一個被告同一環境被捕但係矢口不認嘅係有啲分別，咁所以法庭認為，喺純粹係悔意，慳警察時間方面可以應該得到額外寬免。 4.當然，法庭畀判決時亦都因為要考慮到，你因為認罪，已經畀咗三分一寬免，只能夠象徵式嘅啫，所以法庭就畀多1個月嘅寬免你。所以就係6年起點，三分一寬免就係四--即係47個月監禁。
|