香港特別行政區 訴 何德茂

HCCC264/2009

香港特別行政區

高等法院

原訟法庭

刑事案件 2009 年第 264 號

----------------

----------------

------------------------------------------

判刑
以下內容乃法庭數碼錄音謄本

------------------------------------------

官：被告早於裁判官席前承認過一項販運危險藥物罪，涉及淨含毒量963.04克嘅「冰」，而家交由我懲處。

案情指，被告從深圳到香港過境轉機到東京，結果喺機場畀海關查到纏於腰間嘅毒品。警誡下，佢聲稱由於欠債，先替一名男子帶毒。

背景方面，被告今年37歲，台灣人，離咗婚，曾經喺當地接受小學程度嘅教育，被捕時無業，喺香港冇刑事定罪紀錄。

求情時，律師指佢有經濟困難，第二就係被賭債嘅債主喺深圳碰見，語帶恐嚇咁逼佢帶毒，作為償還。不過我認為呢啲都唔係有效嘅求情理由，尤其係後者，因為辯方承認毒品係第二日先帶去畀被告，期間被告絕對可以報警，請求公安協助，但係佢冇咁做到，反之就被唔使償還賭債呢個誘因（起碼部分影響到）之下帶毒。另外一提嘅係，「安非他命」呢個咁嘅名稱，辯方承認係咩嘢毒品都好，係不比呢個「冰」嘅嚴重性低。另外，佢哋都接受毒品只喺香港過境，而唔喺香港轉售，唔構成求情因素。

無論如何，根據毒品嘅數量，我會以19年為本案嘅量刑基準。被告認罪，可以得三分一嘅扣減，就下調至十二年零八個月，之後就再冇任何減免嘅因素。換言之，被告需要為本案入獄十二年零八個月。