官：被告承認一項管有危險藥物罪，違反香港法例第134章《危險藥物條例》第8（1）（a）及（2）條；以及一項販運危險藥物罪，違反香港法例第134章《危險藥物條例》第4（1）（a）及（3）條
案情指，關員喺一大廈巡邏，喺梯間截查被告，喺佢嘅外套袋中搜獲三包毒品，被告承認嗰啲白粉係供佢自用。嗰啲毒品經過化驗之後，證實為0.96克嘅混合劑，內含0.84克海洛英鹽酸鹽。另關員亦都喺被告住所個房間搜獲毒品同埋包裝工具，被告承認嗰啲白粉同埋冰水係供佢吸食用嘅，佢個房間嘅毒品經過化驗之後，證實為44.31克晶狀固體，內含43.43克甲基苯丙胺鹽酸鹽，以及18.92克混合劑，內含16.69克海洛英鹽酸鹽。就住呢一啲毒品嘅總市值，當時為港幣40,660元。
被告現年29歲，有十一項嘅刑事紀錄，其中六項與毒品有關，當中四項係管有危險藥物，一項係經營煙窟，一項係販運危險藥物。佢喺2009年4月8日，因為管有危險藥物被判戒毒所令，而喺2009年7月29日已經刑滿。事實上，本案係佢喺干犯該案之後擔保期間以及棄保潛逃期間干犯嘅。
大律師喺求情嘅時候指，被告家中父母已經退休，佢喺中二因為染上毒癮被學校開除，其後曾經喺佢父親經營嘅洋服店以及聯誼會中做收銀員，之後又做過學廚。工作期間認識咗一個女性嘅友人，發展成為同居密友。約喺2008年9月，佢喺損友嘅影響下，再次吸食海洛英，後來又因為失去工作，至到今年2月，由於經濟嘅問題驅使下，接受他人嘅建議，幫人運送毒品。而今次佢係獲取毒品之後，等候指示期間被關員拘捕。大律師指，佢喺扣押期間已經體會自由以及親情嘅可貴，希望本席能夠寬大處理，予以一個低嘅起刑點，好讓佢早日刑滿出獄，照顧父母。
本案控罪二涉及兩種毒品，包括43.43克嘅甲基苯丙胺鹽酸鹽以及16.69克海洛英鹽酸鹽。就「冰」毒嘅量刑指引而言，本案嘅「冰」毒係納入10至到70克，即係7至到10年嘅起刑界別。而海洛英鹽酸鹽則納入10至到50克，即係5至8年嘅起刑點界別。根據香港特別行政區訴葉碧貴（譯音）一案，如果案件涉及販運多過一種毒品，法庭喺量刑嘅時候，即使毒品性質以及量刑指引不同，一般嘅做法係首先考慮案中所有毒品嘅總重量，以釐定適當嘅起刑點。
上訴庭喺張國良（譯音）Lowence CACC 539/2002一案中係咁講嘅， “We acknowledge however that it can be a difficult and complex task sentence offenders who traffick in, or possess quantities of, a number of different drugs. In a case such as the present one the starting point should be based on the total narcotic content of the most serious drug, or drugs where the tariff guidelines are co-equal.”
而喺香港特別行政區訴鄭日明一案中，上訴庭指出， “The difficulty being faced in cases of the kind where either an ‘individual’ or a ‘combined’ approach is adopted only arises where the sentencing brackets for the types of drugs are markedly different. Where drugs of a comparable kind, such as heroin, cocaine and methamphetamine hydrochloride are being trafficked the ‘combined’ approach, where a global sentence is taken, can usually be used.” 由此可見，上訴庭認為海洛英鹽酸鹽以及甲基苯丙胺鹽酸鹽屬可相約處理嘅毒品（drugs of a comparable kind）。
而事實上，葉碧貴案中所涉及嘅海洛英鹽酸鹽同埋甲基苯丙胺鹽酸鹽加起上嚟嘅總重量係32.50克，較本案所涉嘅海洛英鹽酸鹽同埋甲基苯丙胺鹽酸鹽嘅總重量60.12克為低。上訴庭喺葉碧貴案中認為，無論將所有毒品嘅總重量當作係海洛英鹽酸鹽或者甲基苯丙胺鹽酸鹽計算以釐定起刑點，9年嘅起刑點係適合嘅。
本案控罪二所有毒品嘅總重量係低於70克，本席認為，無論將所有毒品嘅總重量當作海洛英鹽酸鹽又或者「冰」毒計算以釐定起刑點，又或者以葉碧貴案所指嘅組合判刑方式，即係以主要嘅毒品予以起刑點，然後因應其他數量可供嘅毒品，將起刑點往上調12至到18個月。就住本案嘅毒品而言，第二控罪10年嘅起刑點係合適嘅，予以三分之一嘅認罪扣減，判刑80個月。
就住控罪一，本席以6個月作為起刑點，給予三分之一嘅認罪扣減，判刑4個月。下令控罪一同埋控罪二嘅刑期，同期執行。