香港特別行政區 訴 梁健明

HCCC278/2009

香港特別行政區

高等法院

原訟法庭

刑事案件2009年第278號

----------------

----------------

----------------------

判刑

以下內容乃法庭數碼錄音謄本

----------------------

官：　被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指警員喺一個大廈巡邏嘅時候，睇到被告開啓消防喉轆門，執起一個膠袋，當警員走近嘅時候，被告即刻將個膠袋拋番入去消防喉轆門內，並且將門關上。警員其後撿獲該膠袋，並截查被告，被告起先表示該膠袋與佢無關。其後，警員喺被告喺同一大廈嘅住所發現電子磅同埋大量可再封口膠袋。被告喺警誡下承認，佢係按他人嘅指示去消防喉轆門攞毒品，以及佢係幫朋友看管有關嘅電子磅同埋可再封口膠袋嘅。毒品經過化驗之後，證實為內含166.49克氯胺酮嘅251.30克粉末，當時嘅零售價係港幣29,150鈫。

被告現年19歲，喺2007年10月4日有一項刑事紀錄，被判更生中心令。

大律師喺求情嘅時候表示，被告喺被捕前，喺職修中心讀中四，今次係因為誤交損友，受人唆擺，先至干犯本案嘅，而喺今次事件中，佢只係扮演一個次要嘅角色，亦都唔知道毒品嘅份量係咁大，而家已經非常後悔同埋內疚。

而被告撰寫嘅求情信內表示，佢今次干犯咗嚴重嘅罪行，愧對家人，亦都明白將會面對頗長嘅牢獄，佢會積極進修，希望獲釋之後能夠重新做人。

本席喺量刑嘅時候，考慮咗本案嘅案情，毒品嘅種類、重量、有關嘅量刑指引、被告認罪、大律師嘅求情，亦都閱讀咗被告所撰寫嘅求情信。根據許守城案嘅量刑指引，販運50至到300克氯胺酮起刑點係6年至到9年，就住本案嘅166.49克氯胺酮，本席採納七年半作為起刑點，予以三分之一嘅量刑扣減，判刑5年。