香港特別行政區 訴 林偉揚

HCCC284/2009

香港特別行政區

高等法院

原訟法庭

刑事案件2009年第284號

----------------

----------------

----------------------

判刑

以下內容乃法庭數碼錄音謄本

----------------------

官：　被告承認一項販運危險藥物罪，違反香港法例第134章《危險藥物條例》第4（1）（a）及（3）條以及一項管有危險藥物罪，違反香港法例第134章《危險藥物條例》第8（1）（a）及（2）條。

案情指，警員從被告嘅住所睡房中搜出一個紙袋，內有一大袋以及七小袋嘅毒品，而睡房內亦都有大量未用過嘅可再封口空嘅膠袋。被告承認「K仔」係屬於佢嘅，同佢嘅女朋友無關。後來，警員仲喺同一床頭櫃中再搜出一小包毒品。被告喺警誡下，承認紙袋中嘅毒品佢會包裝好分開出售，而另外嗰一小包嘅毒品係佢服用之後剩下嘅。

控罪一嘅毒品經過化驗之後證實為283.62克粉末，內含217.46克氯胺酮。而控罪二係牽涉內含0.14克氯胺酮嘅1.31克粉末。控罪一嘅毒品當時嘅零售價係港幣32,899元，而控罪二嘅毒品當時嘅市價為港幣151元。

被告現年25歲，過往共有三次共六項係刑事紀錄，有一次與毒品有關，最後一次喺2008年9月5號，因為停牌下駕駛而被判處兩個月嘅刑期，緩刑12個月，本案喺係該案嘅緩刑期內干犯嘅。

大律師喺度求情時候表示，被告有吸食「K仔」嘅習慣，每個月花費喺毒品上費用不菲。佢係愚蠢咁為咗搵快錢而干犯本控罪嘅，而家已經深感後悔，希望本席能夠寬大處理。

本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪、有關嘅求情，又閱讀咗被告以及佢父親所撰寫嘅求情信。根據許守城嘅量刑指引，販運50至到300克氯胺酮嘅起刑點，係6年至到9年。

就住本案控罪一所牽涉嘅217.46克氯胺酮，本席採納八年半作為起刑點，予以三分之一嘅認罪扣減，判刑68個月。另外，就第二項嘅管有危險藥物罪，本席以9個月作為起刑點，判刑6個月。考慮到量刑整體性嘅原則，下令兩項控罪刑期同期執行。

至於被告違反有關嘅緩刑令，本席睇唔到本案存在特別嘅原因唔下令緩刑刑期即時執行，故此下令即時執行KCCC 4852/2008嘅兩個月刑期，與本案嘅刑期分期執行，即係總刑期係70個月。