香港特別行政區 訴 周家欣

HCCC259/2009

香港特別行政區

高等法院

原訟法庭

刑事案件2009年第259號

----------------

香港特別行政區

訴

周家欣

----------------

-----------------------------------------

判刑

以下內容乃法庭數碼錄音謄本

-------------------------------------------

官： 被告承認一項管有危險藥物罪，違反香港法例第134章《危險藥物條例》第8條。

案情指警員喺一個屋苑截查被告，喺佢個褲袋搜出七小包嘅危險藥物。當時被告表示「冰」毒並唔屬於佢。毒品經過化驗之後，證實為20.57克晶狀固體，內含19.33克甲基苯丙胺鹽酸鹽，市值大約13,596元。被告現在承認管有該些毒品。

被告現年30歲，曾經有兩項嘅刑事紀錄，與危險藥物無關，最後一次係刑事毀壞，喺2006年1月被判罰款。根據戒毒所報告、醫生嘅檢查、臨床觀察等情況顯示，被告並冇毒癮，故此唔推薦佢去戒毒所服刑。

大律師求情時指，被告喺被捕前靠喺水產店做散工，以及母親金錢上嘅援助維生。被告承認控罪，彰顯佢嘅悔意，過往亦都冇與危險藥物有關嘅案底。大律師續指，被告被捕後嘅檢驗紀錄顯示毒癖測試呈陽性反應，與佢所稱佢有毒癮以及佢管有嘅毒品供佢個人服用相符，而被捕嘅地點與被告嘅住所相近，家中亦都冇與販毒有關嘅物品，毒品重量亦都並非大致與個人服用之說相抵嘅情況，故此顯示所涉嘅毒品全部係被告自用。大律師要求法庭喺整體考慮下不要就潛在風險一點提高起刑點，假如要提高嘅話，亦都只係酌量提高，寬大處理，好讓被告早日獲釋，與家人團聚。

尹尚心（譯音）一案列低法庭喺處理管有危險藥物罪嘅三個步驟：一，一般採用12至18個月嘅起刑點。二，如果有潛在風險將起刑點提高，法庭喺考慮是否存在潛在風險嘅時候，需要考慮被告當時是否有工作、毒品收藏或者擺放嘅地點、毒品嘅重量以及被告是否曾經有販運危險藥物案底等因素作整體考慮。第三，給予認罪或其他求情嘅扣減。

本案嘅「冰」毒重量係19.33克，根據陳志強案（CACC 390/2004），該案嘅「冰」毒重量係12.47克，上訴法庭認為起刑點18個月係適合嘅。而莫祖迪一案中，牽涉嘅「冰」毒係15.724克，上訴庭亦都認為18個月嘅起刑點係適合，繼而將18個月嘅起刑點因應潛在風險而往上調12個月。

雖然大律師力陳被告當時係有毒癮以及所有嘅毒品均為佢自用，然而被告當時收入並不穩定，雖然家中並冇販運危險藥物嘅工具，本案嘅毒品係分別載喺七個膠袋入面。即使被告當時有吸食「冰」毒，佢將部分嘅「冰」毒提供予他人以支持佢嘅毒癮嘅潛在風險係不容忽視嘅。本席將18個月嘅起刑點提高9個月，至27個月，再予以三分之一嘅認罪扣減，判刑18個月。