香港特別行政區 訴 呂喜
|
HCCC289/2009 香港特別行政區 高等法院 原訟法庭 刑事案件2009年第289號 ----------------
----------------
---------------------- 判刑 ---------------------- 官： 被告人，請起身。你喺呢個08年9月11號喺東區裁判司署初級聆訊嗰陣時，你對呢項控罪係認罪嘅。案情透露，你同傷者呢個喺小學嗰陣時已經識得，傷者就叫你同佢一齊進行一項建築工程，因為就你話承諾咗傷者呢個建築工程，推掉另外一項大概價值一萬元嘅工程。根據今朝早你大律師講，同你求情嗰陣時講，你推咗呢10,000鈫嘅工程，不但蒙受呢個金錢嘅損失，亦都喺行內令到你嘅名氣有損，咁呢樣嘢我判刑嗰時我會考慮嘅。咁另外一方面嚟講，呢個傷者亦都冇履行佢嘅承諾，出現開工。咁呢就你多次就叫呢個控方第一證人（即係傷者）係還番10,000鈫畀你，但係控方第一證人就唔睬你。 好喇，講番呢件事發生嗰日，喺08年10月11日凌晨兩點九個字，你就當時同你嘅妻子喺呢個彩麗樓外面個空地等候傷者出現，咁可能即係相嗌唔好口喇，第一證人（即係個傷者）就係佢唔會畀番錢你。根據案情透露，你就當時用粗言穢語責罵傷者，然後就取出一把刀劈呢個傷者嘅右頸，再然後亂刀劈控方第一證人（即係傷者）身體其他部位。 咁關於傷勢方面，我唔贅喇，我講一講番根據呢個你承認嘅案情，佢嗰個整體情況喺當時嚟講幾嚴重嘅，傷者嘅整體情況：右頸有10厘米嘅創傷、頭頂有8厘米嘅創傷、右邊頭部近太陽穴有兩厘米嘅創傷、右前臂有10厘米嘅創傷、右肘有6厘米嘅創傷、左手手背有6厘米嘅創傷、左手食指及中指分別有兩厘米嘅創傷、右手尺骨及左手食指骨折。咁我哋睇到當時可能你氣憤之下，可能失咗控制，就真係嗰個襲擊佢嘅地方都係好容易令到佢產生呢個嚴重嘅傷勢。你應該慶幸即係呢個傷者康復得好快，否則嘅話，分分鐘呢單就係謀殺或者誤殺案。咁你喺呢個08年10月8號晚上就係被拘捕。 咁我考慮過案情，傷者個傷勢程度即係還可以，唔係太差。咁上次我睇過佢嗰個證人口供，傷者就話由於佢雙手唔能夠靈活運作，咁就可能影響佢以後嘅工作。咁好彩我哋就有呢個最新嘅醫生報告，最新嘅醫生報告，其中一個醫生講，經佢客觀嘅診斷，呢個傷者其實係冇一個永久性嘅傷殘。 呢宗並非一般嘅嚴重傷人案，你哋兩個識得，你同傷者由小學開始識得，唔牽涉黑社會、報復行動或者呢個勒索行動。但係另外一方面嚟講，嗰個傷人嘅程度亦都相當嚴厲，我諗你都明白，喺香港一般普通嘅嚴重傷人案只不過地方法院審訊，呢單案我哋係因為，我唔想猜測，我自己嗰個嘅睇法就係因為個傷者傷勢十分嚴重，所以先嚟到原訟庭係審訊。 咁我亦都接納傷者嘅行為亦都係有啲悔約嘅成份，佢都唔係話好負責任，令到你失去咗個10,000鈫嘅工程同埋你個商譽有損，但係我希望你明白，暴力唔係解決問題嘅方法。咁我睇過你個案底，你嗰啲案底都係有呢個暴力嘅成份，但係就唔係好嚴重嘅。 咁考慮晒所有有關嘅案情，亦都睇過你有一個好年幼嘅兒子，我就採納呢個7年為呢個刑期嘅起點，咁因為你喺舊年9月11號已經喺裁判司署初級偵訊嗰時認咗罪，法律上，呢個係好早、好早嘅認罪，咁我就會畀番呢個三分之一嘅減刑你。 咁我就宣判你要服刑四年零八個月。 |