香港特別行政區 訴 吳少利
|
HCCC228/2009 香港特別行政區 高等法院 原訟法庭 刑事案件2009年第228號 ----------------
----------------
--------------------------------- 判刑 --------------------------------- 官： 被告承認一項意圖使身體受嚴重傷害而淋潑腐蝕性液體罪，違反香港法例第212章《侵害人身罪條例》第29（1）條，而家由我懲處。 案情指被告於案發日清晨6點，因為受丈夫，即係本案嘅受害人責備未如常為後者準備午餐飯盒，而用濃度達九十四個百分比嘅重量比嘅硫酸向佢淋潑，結果導致受害人嘅面、頭皮、後頸同左胸都有八個百分比深嘅局部厚度皮層燒傷、視力受損。 背景方面，被告今年47歲，大陸出生。83年來港，90年下嫁受害人，跟住91同埋94年分別為受害人誕下兩個兒子。案發時一家四口同住於黃大仙一個公共屋邨。受害人係地盤紥鐵工人，而被告則為家庭主婦。此外，被告係冇前科，不過就只有IQ 72嘅有限智商，英文叫 “limited intelligence” 同精神分裂（Schizophrenia）嘅病患紀錄。事實上，佢從1987年開始已經被證實患上精神病，之後仲試過一次自殺同幾次病發需要住院，最後一次據悉係04年，期間顯示出嘅徵狀主要係對親友多疑paranoid delusion against her relatives呢個係報告指出嘅，但係又自省力薄弱（poor insight），同埋不依醫生嘅指示配合治療（poor compliance with treatment）。因此，精神科醫生認為案發時被告係因病誤以為受害人對佢所謂欺壓（going to persecute her），先用預先買嚟通渠嘅通渠水向對方淋潑，如果根據被告自己嘅方法表示，就係話唔知嗰啲液體係咁高腐蝕性嘅，我理解佢嘅意思就係唔知後果會咁嚴重。仲要一提嘅係被告因為呢次事件，全身都有九個百分比全皮厚度嘅燒傷，同3個百分比局部厚度皮層燒傷，位置遍及頸、前胸壁、前腹壁、左肋腹、左臀及呢一個四肢。猶幸嘅係被告同受害人嘅傷勢都已逐漸好轉，我最關注嘅即係受害人嘅雙眼據悉仲得保存住相當一部分嘅視力，例如右眼仲有六十五個百分比，而左眼則更高，有百分之八十五。以受害人自己形容，即係右眼矇矇地，左眼同以前一樣。當然，受害人咁講亦好反映出佢對本案嘅態度，即係完全原諒被告，替被告寫求情信請求輕判。同樣，被告本身亦有向我寫信表示極感悔意，保證唔會重犯。 此外，從種種，例如係家人嘅求情信，顯示被告一家雖然會有為瑣事爭吵，但係總體嚟講都算和睦。而且被告喺家事方面雖然唔係話時時達標，但係對丈夫同兩個兒子都盡力照顧。此外，我留意到個細仔仲有少少輕度弱智嘅。 總括而言，今次呢件事件明顯係完全冇預謀嘅，事發時被告亦相當可能受精神病嘅影響。此外，受害人嘅傷勢並非係最嚴重嗰種，據我目測，面部都唔算難睇，而且除咗視力上，基本係冇影響任何運動或者其他嘅機能。再加上受害人及所有家人對佢嘅原諒，我諗被告人係可以輕判嘅，否則，無疑喺一個受創嘅家庭上灑鹽。不過辯方希望攞到嘅所謂probation（守行為）就唔適合。 我認為本案可以3年為量刑起點，被告認罪，可以得到三分一嘅扣減，就下調至兩年。期間，被告需要根據懲教署嘅判斷同調配，接受住院或非住院式嘅精神科治療。 |