香港特別行政區 訴 鍾維基

HCCC336/2009

香港特別行政區

高等法院

原訟法庭

刑事案件2009年第336號

----------------

----------------

--------------------------------------------

以下內容乃法庭數碼錄音謄本

--------------------------------------------

官：　被告承認一項猥褻侵犯罪，違反香港法例第200章《刑事罪行條例》第122（1）條。

受害人38歲，被告曾經與受害人短暫約會。案發嘅時候，受害人離開佢個住所去倒垃圾，碰見被告，被告將佢拖往後樓梯，推倒佢喺地上，強行脫去佢嘅衣服，又用手抓捏佢嘅胸部，以及用陽具觸碰佢嘅下體。受害人高呼求救，亦都嘗試推開被告，不果，後來一名路過嘅房署職員喝止被告，而被告嘗試逃走，結果被該職員以及兩名保安員制服。被告承認打算同受害人進行性行為，亦都承認自佢與受害人約會之後，已經知道受害人智力遲緩。

受害人屬精神上無行為能力嘅人士，輕度弱智，整體適應力被評估為等同一名10歲兒童嘅程度。受害人喺呢次事件中並冇受傷。

被告現年46歲，過往並冇任何刑事紀錄。

大律師喺求情時指，被告來自漁民家庭，後獲政府分配公屋上岸，與家人轉而從事清潔工作，喺洗衣工場認識受害人，兩人曾經短暫約會。分手之後，被告仍然想再續前緣，事發當日前往搵受害人表白，卻失控干犯現時所承認嘅控罪。現在已經深感後悔，並以此為鑑，希望法庭輕判，讓佢可以早日重新做人。

本席喺量刑嘅時候，考慮咗大律師嘅求情、本案嘅案情、被告過往並冇刑事紀錄及承認控罪。然而即使被告性格內向，不擅與人交往，甚至對受害人心存傾慕之情，亦非佢可強行喺違反受害人意願情況之下對佢為所欲為嘅藉口。更甚嘅係，被告明知受害人智力遲緩，仍罔顧佢嘅意願，侵犯佢。佢亦都承認佢當日係故意去到受害人家外等候，意圖同佢進行性行為。被告人嘅作為猖獗，亦都定必已經令受害人受驚。

法庭保護弱勢社群係責無旁貸嘅，喺判刑嘅時候必須發出鏗鏘嘅信息，以儆效尤。本席以4年作為起刑點，予以三分之一嘅認罪扣減，判刑兩年八個月。