Read the full judgment text of DCCC 000268/2010 on BabelCite. This District Court judgment was delivered on 3 May 2010.
1. 本席接納你律師所講，係冇特別嘅環境或者因素令到你呢兩個控罪比一般類似嘅控罪更加嚴重，至於控方案情開宗明義話你光天化日犯案，呢啲係冇意思。光天化日打劫，個個人都話係好嚴重，咁鼠竊狗偷，通常都係夜瀾人靜行事嘅，咁如果兩害取其輕，任何人都係認為「光天化日」冇咁震撼性，當然意思證明你係大膽，並不表示你令到呢件案嘅因素更加嚴重，如果唔係嘅，夜晚犯案，法官你又話係嚴重，光天化日你又係嚴重，就講來講去都係嚴重，咁就係兩害取其輕嘅，本席認為令到屋入面嘅人受驚嘅程度，或者受驚嘅或然率，或者驚動到屋入面嘅人嘅或然率嚟計，光天化日犯案唔可以--就算唔係比較輕，都唔可以講話係較深宵、夜瀾人靜、個個瞓晒覺犯案為嚴重。