|
HCCC147/2010
香港特別行政區
高等法院
原訟法庭
刑事案件2010年第147號
----------------
| |
香港特別行政區 |
|
| |
訴 |
|
| |
鄭富明 |
|
| ---------------- |
主審法官： 高等法院法官湯寶臣
日期： 2010年7月23日下午12時49分
|
出席人士：
|
律政司高級檢控官伍淑娟，代表香港特別行政區
|
| |
法律援助署法律援助律師關有禮，代表被告人
|
控罪： [1] 至 [3] 向年齡在16歲以下的兒童作出猥褻行為（Indecent conduct towards child under 16）
-----------------------------------------
判刑
以下內容乃法庭數碼錄音謄本
-----------------------------------------
官： 被告係承認咗三項控罪，都係涉及對16歲以下嘅兒童作出猥褻嘅行為，受害人都係同一名嘅14歲嘅男童。
控方案情透露，被告係透過呢個互聯網認識咗男童，之後佢哋相約見面，第一次見面係喺屯門一個廣場嘅男廁裡面，被告仲同埋男童互相有口交同埋手淫，之後佢哋又再次喺屯門另一個商場嘅廁所會面，亦都進行咗相同嘅行為。到咗2月間，佢哋兩人就去咗一間酒店房間裡面，佢哋有互相口交同埋手淫，男童又向被告係進行咗肛交。冇爭議嘅係男童同埋被告嘅交往係雙方自願之下發生，不涉及任何金錢或者報酬。事情經由學校社工揭發咗，最後報警。被告喺警誡之下都係承認有關嘅行為。
被告今年35歲，受過中五程度教育，有三次嘅刑事紀錄，都係同販賣色情刊物有關。心理專家報告亦都係清楚分析咗被告嘅背景同埋情況。
代表被告嘅大律師指出，被告喺二十幾歲嘅時間已經知道自己同性戀嘅傾向，佢同男童嘅關係就係好似男女朋友咁樣。雖然男童年紀係細，但係佢都相當成熟，知道自己係做緊咩嘢，被告並冇係所謂帶壞佢。有關於第三次嘅事件，佢哋係喺情人節相約去酒店，就發生咗關係。男童其實係喺呢個同學間都表現出佢對同性嘅興趣，咁所以學校係揭發咗呢一件事情。代表大律師強調，被告並冇利用男童嘅無知嚟去影響佢，佢亦都係即時認罪，冇浪費法庭嘅時間。代表大律師亦都指出，相比其他嘅案例，本案嘅案情係唔屬於話嚴重嘅程度，希望法庭能夠輕判。
考慮過案情同埋案例之後，本席係決定以18個月作為第一、第二項控罪嘅刑期起點，給予三分一嘅減免之後，刑期係各為12個月；至於第三項控罪，情況其實係涉及肛交，但係被告係被男童肛交，而唔係佢對男童作出呢種行為，控方喺某程度上都係同意嘅，如果男童被成年男子作出肛交嘅行為嘅話，佢所受嘅影響同心理打擊應該係比較大啲，咁但係無論如何，被告係唔應該讓男童係喺冇安全嘅措施之下，同佢進行肛交，本席認為呢一點係令呢項控罪嘅案情較為嚴重，本席認為就呢一項控罪，3年會係恰當嘅刑期起點，喺減咗三分一之後，刑期會係兩年。
本席考慮到呢個專家指，被告嘅重犯風險比較低，而佢亦都唔係話有戀童癖嘅問題，亦都考慮到整體刑期方面，本席會下令第一、第二項刑期同期執行，但其中6個月則與第三項控罪嘅刑期分期執行，即係話一共30個月。
|