案情指，警員喬裝毒品買家聯絡上第一被告，去到指定嘅地點進行交易嘅時候，第一被告要求警員隨佢上樓取貨，警員拒絕。第一被告上樓攞貨期間，第二被告出現，並向警員指人人都係上去攞㗎喇，喺條街度仲危險。之後，第一被告返嚟，將一個白色嘅膠袋放喺地上，警員取過該袋毒品，第一被告叫警員付錢畀第二被告。交易完成之後，兩人被埋伏警員拘捕。
第一被告指啲貨屬於第二被告，佢只係賺少少錢啫，而第二被告就承認佢從他人處獲取呢一啲毒品，第一被告負責攞貨、佢負責收錢。其後，警員搜查第二被告嘅單位，發現多袋毒品，以及多片嘅毒品片劑、一批可再封口膠袋，以及一個電子磅。其後，第二被告承認佢讓他人喺佢個單位中擺放毒品，而其他人負責攞貨畀客人，佢負責收錢，佢會用透明膠袋將盛載膠袋有破漏嘅毒品重新包裝。
控罪一所涉及嘅毒品經過化驗之後，證實為240克粉末，內含170克氯胺酮，當時零售價係29,040鈫。單位內嘅毒品則為內含1.44克可卡因嘅1.93克固體，內含382.89克氯胺酮嘅835.34克粉末，以及十九片內含2.73克氯胺酮嘅片劑，該些毒品，當時嘅零售價係102,625元。
第一被告現年32歲，曾經有二十三項刑事紀錄，涉及三十項控罪，當中有六項係涉及危險藥物，最後嘅紀錄係喺2009年12月29日，因為管有危險藥物被判監8個月，喺2010年5月出獄，本案係喺該案干犯之後擔保期間干犯；第二被告現年39歲，曾經有一項與本案佢所面對兩項控罪同類嘅刑事紀錄，喺2007年被判監兩年八個月，08年4月獲釋。
代表第一被告嘅大律師喺求情嘅時候表示，第一被告從來都冇販運危險藥物嘅案底，而事發嘅時候，佢嘅女友已經懷孕三個月，佢急需賺錢先會鋌而走險，干犯本案，可惜並未收取1,000鈫嘅報酬，已經被拘捕；代表第二被告嘅大律師則指，第二被告喺2008年離婚之後，獨力供養以及照顧現年15歲嘅兒子，因為經濟拮据，先至愚蠢地干犯本案。兩位大律師均希望本席能夠予以輕判，本席喺量刑嘅時候考慮咗本案嘅案情、牽涉毒品嘅種類、重量、有關嘅量刑指引、兩名被告認罪，以及大律師嘅求情。
就第一被告所牽涉第一項控罪嘅170克嘅氯胺酮，根據許守城嘅量刑指引，納入50至到300克，六至到九年嘅量刑界別，本席採納七年半作為起刑點，予以三分之一嘅認罪扣減，判刑5年。
而第二被告兩項控罪，所涉及嘅氯胺酮總重量大約係555.62克，納入300至到600克，即係九至到十二年嘅量刑界別，另外所牽涉嘅可卡因重量，並不會導致起刑點進階至另一界別，本席以十一年九個月作為兩項控罪嘅總起刑點，予以三分之一嘅認罪扣減，判刑七年十個月，分配如下：控罪一，5年、控罪二，七年十個月，同期執行。