官： 被告林華鷹被控一項販運危險藥物罪，違反香港法例第134章《危險藥物條例》第4（1）（a）及（3）條。被告喺裁判官席前認罪同埋同意案情之後，交付高等法院原訟庭判刑。
案情顯示，案發嗰日，被告人就喺上水地鐵站同埋一個商場之間嘅天橋度畀警員截查，當時佢住一個紙袋。警員搜查個紙袋嘅時候，就發現入面有三包係用報紙包住嘅小包;而後屘經過化驗之後，發現入面其實係有一啲嘅粉末，粉末嘅總重量係1,250.90克，而氯胺酮份量係1,062.44克。計過當時嘅市價係大約十四萬。拉咗被告之後，被告喺警誡之下要求警員畀次機會，同埋話佢係幫他人帶呢啲毒品嘅。後屘返到去差館，就有一個錄影嘅會面。當時被告人詳細交代佢係點樣幫一個叫做「阿強」嘅人帶呢啲毒品，而報酬係3,000鈫。
被告背景方面:29歲٠喺內地出生٠有五次刑事紀錄 - 四項都係管理呢個色情嘅場所;同埋一項係展示嗰啲賣淫嘅招牌咁嘅٠未婚٠喺屋企嚟講係唯一嘅仔，亦都係最細嗰個 - 因為爸爸媽媽喺被告未出生之前已經有五個女㗎喇。代表被告嘅律師彭大律師就話畀本席知，被告來自一個基督教嘅家庭。五個姐姐中，有部分已經係喺外地，喺澳洲、英國咁樣。雖然屋企人曾經試過送被告去澳洲，就諗住讀書，但係因為追唔上啲功課，終於就返番嚟香港。返咗嚟香港之後，佢曾經做過廚房學徒，又試過去做裝修工人，然後後屘就係干犯咗嗰五項控罪，就係有坐過監嘅。最後一次放監就係2008年。出咗監之後，一路都搵唔到嘢做。
被告來自小康之家，爸爸未退休之前，其實就喺內地擁有一間興建道路嘅建築公司，不過而家已經退咗休。佢爸爸最近亦都有兩次中咗風，令到佢講嘢方面有困難，同埋左手行動不便。被告嘅爸爸寫咗一封非常之動人嘅求情信畀我。喺呢封信裡面，佢亦都承認佢個仔 - (即係被告你)係犯咗法，應該得到懲罰;但係另一方面，佢亦都要求本席輕判你，等你可以早啲出獄。被告有家庭支持，因為除咗屋企人有去荔枝角探被告你之外，亦都有兩位家姐而家喺法庭度支持你。
彭大律師亦都確證被告人你喺警誡口供入面所講情況 - 即係話為咗3,000鈫去幫人帶呢一啲嘅氯胺酮 - 係的確你犯罪嘅原因。彭大律師亦都坦白承認喺呢件案件嚟講，最主要嘅求情理由就係你認罪，咁亦都話畀我聽，其實佢已經同你解釋咗呢一類案件係涉及氯胺酮，可以期待嗰個量刑起點係幾多㗎喇:14至15年，咁佢已經講咗畀你聽。
喺判刑方面，販運危險藥物係非常之嚴重嘅罪行，干犯販運危險藥物罪行嘅人，一經被捕係會受到嚴懲。就氯胺酮喺有一個相當之新嘅案例 - 許守城。喺嗰件案件，上訴庭已經頒下量刑指引，就係如果販運嘅氯胺酮係超過1,000克(即係1公斤)，起碼14年向上，向上調即係14年以上，當然要睇下過咗1公斤幾多，咁就要作出一個釐訂。被告雖然唔係話年紀好大，但係29歲都唔可以話好細，仲有亦都唔係第一次犯事 - 五次案底，今次係第六次。當然，本席亦都會考慮到被告你係首次干犯同毒品有關嘅罪行。
被告來自一個基督教家庭，其他成員全部都係非常之守法，同埋根據你個大律師所講，他們係盡量去為自己前途進修，因為其中一個家姐而家仲係讀緊博士嘅學位。好明顯，被告係家中唯一嘅仔，爸爸媽媽同埋所有嘅家姐自然就係對被告期望係非常之高。好不幸，被告你一次又一次咁樣犯罪，仲要今次係干犯咗咁嚴重嘅罪行。本席完全明白你嘅父母因為呢件事件，佢哋嘅心情會係點樣，亦都明白你嘅家姐佢哋難過嘅心情會係點樣。雖然，本席能夠理解佢哋所承受嘅悲痛，但係事實上本席有責任就你所干犯咁嚴重嘅罪行判予適當嘅刑期。喺你家庭背景，並唔有任何嘅情況足以令到本席唔跟隨呢一個量刑嘅指引。正如你嘅代表大律師所講，喺呢件案件，唯一嘅求情理由就係你及時認罪。
喺考慮咗呢件案件整個嘅案情 - 即係包括你當時點樣被捕，同埋呢件案件涉及嘅氯胺酮嘅份量 - 同埋你嘅背景:你嘅背景就係你唔係一個完全冇犯過事嘅人，不過係冇犯過同毒品有關嘅罪行，本席認為恰當嘅量刑起點係15年。
被告坦白認罪，亦都係及時認罪，可以得到足足嘅三分之一刑期扣減，就而家呢一個罪行，被告需要服刑10年。