|
HCCC164/2010
香港特別行政區
高等法院
原訟法庭
刑事案件2010年第164號
----------------
| |
香港特別行政區 |
|
| |
訴 |
|
| |
杜重達 |
|
| ---------------- |
| 出席人士： |
律政司高級檢控官趙偉天先生，代表香港特別行政區
馬維騉先生，由法律援助署委派的Pang, Wan & Choi律師行延聘， 代表被告人 |
| 控罪： |
[1] 向年齡在16歲以下的兒童作出猥褻行為（Indecent conduct towards a child under the age of 16）
[2] 與21歲以下的男子作出同性肛交（Homosexual buggery with man under 21） |
----------------------
判刑
以下內容乃法庭數碼錄音謄本
----------------------
官： 被告承認兩項控罪。控罪一，向16歲以下兒童作出猥褻行為，違反香港法例第200章《刑事罪行條例》第146（1）條；控罪二，與21歲以下男子作出同性肛交，違反同章法例第118C（a）條。
2009年9月，涉案男童（我哋叫「X」）喺網上認識咗被告，稍後即與其約會，地點係新界沙田金禧花園嘅商場。見面之後，被告將X帶返自己喺附近嘅屋企互相口交，此外被告亦為X手淫至射精，呢個就係控罪一。同年9月底或者10月初，X再次約會被告，佢哋喺被告屋企互相口交，跟住由被告戴上安全套向X進行肛交，X覺得痛，叫被告停止，被告就替X手淫至射精為止，呢個就係控罪二。
被告喺上述兩件事件發生嗰時係32歲，X則為十五歲零兩個月。呢兩次事件被揭發，就係X嘅老師知道X曾經同男性有過性關係，後來又發現X喺facebook嗰度同其他同性戀者聯繫，結果按捺不住，向校內嘅社工報告，之後再由校方報警。換言之，X喺上述兩件事件都係自願嘅，佢甚至喺自己嘅心理報告提出，老師將佢嘅事情曝光，佢唔高興嘅，此外亦認為香港嘅法律過於保守，擔心被告同埋其他同佢有過關係嘅男子要負上嚴重嘅後果。總括而言，X唔覺得自己係性罪行嘅受害人，同樣，心理學家亦見唔到呢啲罪行對佢有任何負面或者具創傷性嘅後果，英文就係 “did not result in any negative or traumatic impacts on the client’s general well behaviour” 。
至於被告，佢現時已經33歲，香港出生及受教育至中五程度，之後喺一間連鎖嘅快餐店做過十五年，職位升至副經理。喺09年6月轉做網上買賣嘅小生意，亦同時喺一間雪糕店兼職。案發嗰時獨居，冇定罪紀錄。
求情嗰時候，律師話本案冇涉及暴力同埋變態嘅行為，性交嗰時候係雙方願意嘅，兼有用安全套，而且被告冇利用閱歷、經濟、優勢或者X對佢嘅信任。案發後，X冇受到任何身體或者心理上面嘅傷害。相反控罪一嗰次，更加係X主動約被告外出嘅--呢個係控罪二，係咪？最後，律師亦都話被告明顯唔係孌童癖，心理報告亦冇任何顯示佢會再犯，所以本案係同類案件中情節較輕嘅一件。
以上嘅陳述我大體同意，不過如此這般嘅都只係顯示本案冇律師提到嘅嚴重情節，而唔係有咩嘢特別嘅求情因素。事實上，上訴法庭喺HKSAR v Chow Yuen Fai [2010] 1 HKLRD 354已經指出過，呢類控罪（尤其係控罪二）本身就係嚴重嘅，法定嘅刑期上限係終身監禁。
仲有，被告犯案嗰時32歲，比X係大一倍，呢個係法庭唔可以忽略嘅。事實上，被告親口向心理學家承認知道與16歲以下嘅人士有性行為犯法，卻未能制止年長一倍嘅自己咁樣做。當然，喺我席前被告嘅講法係話，歲數嘅問題（我引述）「佢冇問，X亦都冇講」，不過我就留意到以下幾點：一，X喺自己嘅供詞嗰度話，喺網上已經講過畀被告聽佢15歲，而樣貌同身材都比佢實際年齡年輕得多嘅被告就話自己25歲。而被告喺自己嘅錄影話事發嗰時候唔知X幾多歲，不過就覺得佢（我引述）「14、15、16、17咁上下，13... 14至17歲左右」，呢個係236段。不過去到426段，佢又話（我引述）「見佢嗰時我應...我記得係知道嘅」，即係話知道佢幾多歲嘅。第三點，就算喺庭上，被告都話知X仲係學生，讀中四或者中五，所以法庭有理由相信被告知道X嘅實際年齡，否則法庭最少亦可以斷定被告蓄意去迴避呢個問題，用番佢自己講嘅一句說話，就係「知啲唔知啲」。
基於以上各種因素嘅考慮，我認為即時監禁係本案唯一合適嘅刑罰。刑期方面，我會以18個月作為控罪一嘅量刑起點；亦都會以四年半作為控罪二嘅量刑基準。被告認罪，可得三分一嘅扣減，就下調至1年同3年。
至於總刑期，我實在睇唔到兩個刑期唔應該分開執行嘅道理，結果亦我唔認為會過重，所以我下令控罪一同控罪二嘅刑期完全分期執行。換言之，被告需要為本案總共入獄4年。
上訴法庭批准被告人就判刑上訴。請参閱 CACC396/2010 日期: 2011年4月13日
上訴法庭批准被告人就判刑上訴。請参閱 CACC396/2010 日期: 2011年4月13日
上訴法庭批准被告人就判刑上訴。請参閱 CACC396/2010 日期: 2011年4月13日
上訴法庭批准被告人就判刑上訴。請参閱 CACC396/2010 日期: 2011年4月13日
上訴法庭批准被告人就判刑上訴。請参閱 CACC396/2010 日期: 2011年4月13日
|