案情指，警員喺被告離開住所單位嘅時候截查被告，喺佢個褲袋一個煙盒內發現兩個載住毒品嘅密實袋，被告喺警誡下，表示該兩包毒品係佢自用嘅。其後，警員搜查被告嘅單位，喺佢個房間發現合共三十六包氯胺酮、一個電子磅，以及多個透明密實袋。被告承認販賣毒品，賺取金錢。
毒品經過化驗之後，證實喺被告身上攜帶嘅毒品係22.72克粉末內含18.71克氯胺酮，而佢單位內係有482.79克粉末內含398.06克氯胺酮，毒品總數量當時嘅零售價為港幣56,617元。
被告現年19歲，單身，過往有四次與本案類型不同嘅刑事紀錄，最後一次係喺2007年6月12日因為盜竊罪被判去戒毒所服刑，喺2007年11月獲釋。
大律師喺求情嘅時候表示，被告父母離異之後，家中經濟只係靠佢嘅二姐從事美容行業以及被告從事運輸工作支持，但係被告喺2009年失業，本年2月嘅時候，佢偶遇一名佢之前喺深圳已經認識嘅朋友，受到朋友誘使，佢自己為咗想搵快錢，所以先至干犯嚴重罪行。大律師續指，被告喺被捕之下與警方充分合作，坦白承認控罪，而喺裁判署亦都第一時間認罪。而根據被告親筆寫嘅求情信，佢喺獄中已經自我反省，知道干犯罪行愧對家人，希望法庭能夠寬大處理，好讓佢早日出獄，報答母親以及重投社會。
本席喺量刑嘅時候考慮咗本案嘅案情、毒品嘅種類、重量以及有關嘅量刑指引，亦考慮咗被告認罪、大律師嘅求情，亦都閱讀咗被告所撰寫嘅求情信。根據許守城案嘅量刑指引，販運300至到600克氯胺酮嘅起刑點係9年至12年。就本案兩項控罪，合共所牽涉嘅係416.77克嘅氯胺酮，本席採納10年為總起刑點，予以三分之一嘅認罪扣減，判刑80個月，分配如下：控罪一，3年；控罪二，六年八個月，同期執行。