香港特別行政區 訴 馬嫚樺

HCCC319/2009

香港特別行政區

高等法院

原訟法庭

刑事案件2009年第319號

----------------

----------------------

判刑
以下內容乃法庭數碼錄音謄本

----------------------

官：　　　　被告早於裁判官席前，已經承認過一項販運危險藥物罪㗎喇，即係以凈含毒量計598.89克嘅氯胺酮及1.11克嘅可卡因。

情節方面好簡單嘅啫，就係警方接獲線報，喺涉案單位外面埋伏，最終等到被告喺屋內出嚟，於是將佢截停，入去入面搜查，結果發現有關嘅毒品同一啲包裝工具。警誡下，被告承認喺上述嘅單位包裝所謂「K仔」。

被告現時十九歲半，案發嗰陣時仲有七日就滿18歲，香港出生同埋受教育至中五程度，之後冇做過嘢，同母親、同兩個姊妹同住嘅，冇刑事紀錄。所謂冇做過嘢，就係做下啲咩嘢茶餐廳、咩嘢兼職裝修嗰啲咁樣嘅嘢。

求情嘅時候，律師指佢家境唔好，咁就係誤交損友，咁就為到又係搵快錢而犯下本案，但係呢啲都唔係有效嘅求情理由嚟。

有鑒於涉案毒品嘅數量，我認為一個12年嘅量刑基準係合適，被告認罪，可以得到三分一嘅扣減，就下調至8年。