被告喺裁判官席前已經承認控罪同埋同意案情，然後交付嚟高等法院原訟法庭判刑。
案情顯示，喺今年5月5日當被告人步出汝州街200號1樓B一個單位嘅時候，喺該處1樓梯間埋伏嘅警員將被告截停。搜身之後，警員喺被告嘅前褲袋搵到一包思疑危險藥物，警員就用販運危險藥物嘅罪名嚟拘捕被告。
被告喺警誡之下，就話佢係將啲「K仔」拎去賣畀人。其後警員就用被告管有嘅鎖匙入咗去1樓B單位去搜查，搜出一共係十一包思疑嘅危險藥物，同埋一啲包裝嘅工具，包括係電子磅、可再封口膠袋同埋匙羹。
喺警誡之下，被告話佢將呢啲「K仔」賣畀他人嘅，其後警方就同被告進行錄影會面。喺錄影會面期間，被告指稱係佢嘅朋友阿雄安排佢去送貨嘅工作，阿雄畀咗6,000鈫畀佢，就用佢自己嘅名義去租屋，阿雄亦都畀咗個手提電話畀佢愛嚟做聯絡之用。
喺案發嗰日，阿雄將三包氯胺酮係交咗畀呢個被告人，然後吩咐被告人將呢三包氯胺酮再分裝為分別係28克同埋14克嘅小包，於是被告就依照阿雄嘅指示而做，而且喺單位度係等候呢個阿雄嘅指示，其後就依照呢個阿雄嘅指示，即係拎咗一包重28克嘅氯胺酮就準備送去旺角一間酒店嘅，啱啱出門口嘅時候被捕。
被告人話佢係第一次幫阿雄送貨，事成之後佢可以獲得$800至1,000鈫嘅日薪作為報酬。
而喺被告身上同埋喺呢一個單位入面搵到嘅毒品，後來就送咗去政府化驗所度做化驗。化驗咗之後，發覺全部夾埋係總共448.18克嘅氯胺酮，而嗰啲粉末就重少少，就係561.19克，而嗰個膠匙羹亦都係有內含0.04克氯胺酮嘅粉末，市值就大概60,000鈫。
被告個背景同埋求情陳詞方面喇，被告而家係20歲，冇刑事紀錄。龔大律師喺求情嘅時候同本席講，就話被告媽媽喺被告三個月大嘅時候就已經離開咗被告，被告從來都係冇見過媽媽，唔識媽媽嘅，而係由佢阿嫲湊大。而爸爸後來係再婚，而繼母對被告相當好，視如己出，而被告亦都有一個相當之親密嘅女朋友。讀書方面，讀到其實係中四程度，亦都有做過唔同嘅散工，包括係侍應、煮嘢或者係做呢個搬運工人咁樣，但係喺案發嘅時候，當時係冇工作做嘅，係失業嘅。
而龔大律師喺求情嘅時候亦都強調，喺呢件事件被告喺被捕之後一直同警方好合作，亦都係一早承認咗呢一個控罪。被告本人亦都對於而家干犯咗嘅控罪深感後悔，亦都決意喺監獄入面有機會係再讀書完成中五，同埋係搵一技之長，希望用咁樣嘅方法去報答對自己一路有關愛、唔離棄自己嘅人。
龔大律師亦都將被告親自撰寫嘅求情信同埋被告爸爸寫嘅求情信係交畀本席參考。
龔大律師亦都將四件喺高等法院唔同法官就同樣類型、差唔多份量嘅案件販運危險藥物嘅案件畀本席作為參考。龔大律師希望本席係將兩項嘅控罪個判刑同期執行，同埋係引用一個較低嘅量刑起點，亦都給予被告你三分之一嘅刑期扣減。
販運危險藥物係非常之嚴重嘅罪行，干犯者一旦被捕，係需要面對非常之嚴峻嘅懲罰，喺許守城案件，上訴法庭訂下咗販運氯胺酮嘅量刑指引。呢件案件涉及嘅份量就喺300至600克之間，所以個量刑起點係9至12年。
被告今次所干犯嘅行為其實唔係凈係做「帶家」咁簡單，被告所牽涉嘅行為，可以睇到佢係用自己嘅名義去租一個房，喺個房入面係做分裝嘅工作，就係將呢個大包啲嘅毒品用電子磅磅咗之後分為係重28同埋14嘅大細包，然後先至再聽取指示帶毒品出去賣畀他人嘅。所以喺考慮呢個量刑嘅時候，呢一點本席係要考慮在內，就係佢牽涉嘅程度。但係另一方面，被告亦都仲算係年紀幾輕，20歲，未夠21歲，同埋今次佢係第一次干犯任何嘅控罪，唔係話啲案底纍纍，已經販毒都犯過好多次，呢個亦都會係考慮在內嘅。
考慮晒所有頭先所講呢個犯罪嘅環境情況同埋被告人嗰個背景，冇案底，同埋年紀都相當輕，本席就認為一個十年半嘅量刑起點係恰當嘅，被告好明顯就係喺早嘅時候、最早可以認罪嘅階段已經認罪，可以得到三分之一嘅刑期扣減。
本席明白，被告認罪呢一個行為已經顯示到係有悔意，同埋被告亦都親身撰寫信件講到佢個悔意係點樣，即係對唔住屋企人，點樣希望係能夠有朝一日出嚟，仲能夠係服侍番湊咗自己好耐嘅阿嫲，同埋話報答番其他屋企人，有女朋友對佢又不離不棄。當然如果被告人能夠係做到，呢個係最好，但係始終冇辦法係由其他人去左右你嘅一生，只有被告人你自己，你先至可以決定到底你下一步係點行。你會唔會係話再重蹈覆轍再去干犯控罪，定係話坐完監出嚟之後真係重新做人唔再犯事，呢個即係你決心悔意呢一點，已經喺三分之一刑期扣減度係反映咗㗎喇，就唔會係話因為你而家話畀法庭聽你立心係會悔改，你喺個監獄裡面會努力讀書而會有其他嘅刑期扣減。
本席亦都明白到，父親當然係自責喇，因為佢覺得自己掛住做嘢，疏於管教，令到你而家係犯咗罪。但係其實本席亦都希望可以強調，一個人自己犯唔犯罪就唔係關爸爸媽媽事嘅，即係唔可以話爸爸媽媽掛住做嘢係疏於管教，就你自己去犯罪。因為始終係你自己嘅決定，你可以去做好人，可以唔去做好人，所以我亦都希望你爸爸唔好去太過自責。咁但係當然，即係屋企入面嗰個情況，譬如話阿嫲年紀大，阿嫲又受咗傷，呢啲都唔構成係話特別嘅人道理由而令到本席將嗰個刑期係再為遞減，即係話喺呢件案件，除咗頭先所講嗰三分之一嘅刑期扣減之外，係唔會有其他嘅刑期扣減。
以十年半作為起點，扣咗三分之一之後，個刑期就係7年。所以正式嘅判刑，第一項控罪係兩年半；第二項控罪係7年，同期執行，即係全部都係7年。