承認嘅案情顯示，喺今年嘅6月7號，被告人就到達咗香港嘅羅湖邊境管制站大堂，當時係被截停，搜身之後，就發覺佢嘅腰部係纏咗六個嘅透明膠袋，另外小腿分別係有三個嘅呢個膠袋，夾埋總共係十二個，就係載住氯胺酮嘅，被告人都承認，佢知道嗰啲係氯胺酮。咁拉咗被告人係販運危險藥物之後，警誡之後，被告人就承認係幫人由深圳度帶十二包嘅氯胺酮入嚟香港，報酬係6,000鈫。
後來，被告人就係畀警方調查，接受呢個錄影嘅會面。咁錄影會面嘅時候，佢基本上提及就有個叫做光仔嘅人，就畀咗十二包嘅氯胺酮佢，同埋畀咗一啲嘅膠紙畀佢，就喺深圳度做嘅，咁就叫佢就係帶咗嚟香港之後，分別係送去四個唔同嘅地方，報酬係6,000鈫。咁而後來，警方就係安排咗將呢一啲嘅氯胺酮係去化驗，化驗之後，就全部嘅重量係2,973.85克一啲嘅粉末，而入面含有氯胺酮嘅份量係1,906.34克，而市價喺個--即係街度可以賣到嘅，大概係348,000鈫。
背景喇。被告係47歲，喺內地出生嘅，咁喺1980年嘅時候就已經嚟咗香港同阿爺住，咁但係自從2003年開始，就已經返番去內地，喺深圳度住，就唔係初犯㗎喇，已經係試過七次喺香港嘅法庭出現，夾埋晒有四十五次嘅案底，咁大部分嘅案底都係同盜竊，或者係呢個搶劫有關嘅，咁雖然被告亦都係涉及一啲假槍，同埋係有試過洗黑錢，而家係因為洗黑錢嘅罪名，係坐緊一個6個月嘅監，最快嗰個釋放嘅日期就係出年嘅1月。
羅大律師代表被告人求情嘅時候就話畀我知，被告人之所以干犯呢個控罪，係因為財政上嘅困難，冇嘢做，又想搵錢去供養媽媽，同埋喺內地住嘅媽媽，同埋喺內地住嘅妹妹，因為佢亦都係冇工作做嘅，咁所以就希望搵到錢。咁羅大律師亦都係好明確咁樣係接納，喺被告人你呢個嘅案件嚟講，唯一嘅求情說話就係被告人你係承認控罪。咁羅大律師亦都接納，喺呢件案件，因為牽涉到喺過關呢一個情節，所以係令到嗰個案情係特別嚴重嘅。
羅大律師亦都係向本席提及，有四宗係其他高等法院處理相類似案件嘅時候嗰個嘅做法，咁分別就係李明言（譯音）、林國雄（譯音）、陳啟明（譯音），同埋鄭麟鴻（譯音）嘅案件。所有呢一啲嘅案件，涉及嘅被告人都係喺內地帶超過一公斤嘅氯胺酮嚟香港。李明言就係二點二公斤，最後法官就用16年做量刑起點，個刑期係十年八個月；林國雄就二點五七公斤，十七年半起點，十一年八個月判刑；周啟明（譯音）佢有三條控罪嘅，凈係講第一條喇，因為第一條就係販運嘅，就係一點六六公斤，咁而法官係用16年做呢一個量刑起點，不過加多一年，就係因為有呢個過境嘅性質，咁然後就用十一年兩個月係最後嗰個判刑，因為呢個被告係冇案底嘅，咁就再除咗三分之後，再減多兩個月；最後嗰單鄭麟鴻就係一點三六公斤，法官用十五年半作呢個量刑起點，最後嗰個判刑係十年四個月嘅。
販運危險藥物係非常之嚴重嘅罪行，呢個被告人一旦係被捕，罪名成立之後，係判處非常之嚴厲嘅監禁。上訴庭亦都喺許守城呢一宗嘅案件，頒下咗販運氯胺酮嘅量刑指引，咁而根據呢個指引，如果販運係超過一公斤，1,000克以上，個起點係由14年以上開始計嘅。好明顯，呢件案件涉及一個國際性喇，所謂，因為被告人係喺內地，將呢一個毒品由內地帶入嚟香港嘅，咁而亦都已經係有案例支持，係話呢個係一個令到案件更嚴重嘅情況，案例係Abdullah。
喺今次呢件案件所涉及嘅氯胺酮係1,906.34克，即係其實都差唔多兩公斤嘅。咁而考慮晒呢件案件嗰個情況，即係被告人係點樣被捕，包括埋當然就係有呢一個跨境嘅國際性呢一個性質，就同埋被告人你個背景之後，本席就認為17年嘅量刑起點係啱。被告人係一早已經承認控罪，可以得到一般嗰個三分之一嘅刑期扣減，所以最後個刑期係十一年四個月，因為冇其他嘅減刑理由㗎喇，即係除咗認罪嗰三分之一刑期扣減。根據呢一個--以呢個計法，就而家販運危險藥物嘅罪名，被告人係要坐監十一年四個月。
被告而家其實係坐緊6個月嘅監，即係嗰個洗黑錢嗰個罪名，嗰個判刑係今年11月嘅時候頒下，咁以而我理解，被告人最快係應該就該項罪行，喺出年嘅1月就已經係可以出監。咁本席考慮到，其實今日，本席判嘅刑期已經係好長㗎喇，十一年四個月，咁我就唔認為係應該要將今日嘅刑期頒令係要坐完咗嗰個6個月嘅監先至開始計，我就唔會出呢個命令嘅，我而家嗰個刑期係由今日開始計，咁即係話某部分嘅刑期，即係今日呢十一年四個月嘅某部分刑期，係將會同洗黑錢嗰個刑期，係同期執行。