案情指，關員喺上水港鐵站出口監視被告及另一名男子，並隨佢哋登上一輛巴士。後來喺巴士上關員表明身分，及帶被告登上喺附近停泊嘅一輛政府車進行搜查，關員從佢嘅短襪內搜出一共六袋嘅毒品，被告承認毒品係「K仔」以及係佢從大陸帶返香港販賣。毒品經過化驗之後，證實為載有內含1,221.73克氯胺酮嘅一共1,492.75克粉末，毒品總數量當時嘅零售價為港幣174,651元。
被告現在57歲，過往有六項刑事紀錄，涉及七條控罪，全與本案嘅控罪不相同，最後一次係喺1999年，因為普通襲擊罪，被判簽保守行為令。大律師喺求情嘅時候表示，被告已經喺97年離婚，子女均已長大成人，但係兒子被診斷患上思覺失調，需要接受精神及心理治療，被告因為要照顧患病嘅兒子，需要靠綜援維生，而今次犯事係因為佢欠下財務公司債項，受咗他人唆擺，為咗搵快錢，而將毒品從深圳帶返香港。
大律師強調，本案最大嘅求情因素係被告認罪，亦都希望本席考慮被告嘅家庭環境，予以輕判。本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱讀咗被告女兒所撰寫嘅求情信。根據許守城一案嘅量刑指引，販運1,000克以上氯胺酮嘅起點由14年起，本席參考咗以下高等法院刑事案件嘅判刑，佢哋均涉及將氯胺酮從大陸運入香港，令案情情節嚴重嘅因素。第一，香港特別行政區訴 Gary Tam（HCCC 101/2010），涉及1.35公斤嘅氯胺酮，起刑點為16年；二，香港特別行政區訴徐志華（HCCC 14/2010），涉1.69公斤氯胺酮，起刑點係16年；三，香港特別行政區訴 Chan Lun Hung（HCCC 169/2010），涉及嘅係1.36公斤氯胺酮，起刑點係十五年半。
就本案嘅1,221.73克嘅氯胺酮，以及本案涉及喺大陸販運入香港嘅跨境因素，本席採納15年嘅起刑點，予以三分之一嘅認罪扣減，判刑10年。