香港特別行政區 訴 周敏聰

HCCC16/2011

香港特別行政區

高等法院

原訟法庭

刑事案件2011年第16號

----------------

----------------------

判刑
以下內容乃法庭數碼錄音謄本

----------------------

官： 被告人係承認一項販運毒品罪，被告係同意案情。

簡單嚟講，就係警員喺一輛私家車上面搵到毒品，當時被告人係車上嘅乘客。後來佢係承認為咗500鈫嘅報酬，替人哋運送呢個毒品，而佢亦係私家車嘅車主嚟嘅。

涉案嘅毒品有162克嘅氯胺酮，市值大概係二萬幾鈫嘅。

被告今年26歲，有三次嘅刑事紀錄，有相同嘅販運毒品嘅定罪紀錄。代表佢嘅張大律師喺求情嘅時間指出，被告其實一直都有工作嘅，亦喺上次嘅毒品案之後係戒除咗毒癮，但係因為後來公司嘅工作量係唔夠，變相失業，所以先至係鋌而走險，替人哋販毒。張大律師亦都呈上咗被告家人同埋僱主嘅求情信件畀法庭，希望法庭可以係盡量輕判。

其實被告喺2002年已經觸犯過販運毒品罪，當時法庭可能因為佢年輕而畀機會佢，判咗入勞教中心，照計佢係應該係得到教訓，但係被告似乎係不知悔改，又再次涉及販運毒品。喺咁嘅情況之下，本席好難接受被告係話真係一時嘅貪念呢，先至咁樣做。

無論如何，考慮到案例嘅指引，本席會以七年半為刑期嘅起點，扣減三分一之後，刑期係5年，希望被告今次真係可以徹底反省一下。