香港特別行政區 訴 嚴錫和

HCCC17/2011

香港特別行政區

高等法院

原訟法庭

刑事案件2011年第17號

----------------

----------------

----------------------

判刑
以下內容乃法庭數碼錄音謄本

----------------------

官：　　　　被告人嚴錫和被控一項販運危險藥物罪，違反香港法例第134章《危險藥物條例》第4（1）（a）同埋（3）條。被告人喺裁判官席前承認咗控罪同埋同意案情之後，交付高院原訟法庭判刑。

案情顯示，喺案發嗰日有一隊海關嘅人員進行反毒品行動，呢啲人員見到被告人喺翠竹花園7座嗰度入咗去，後屘就發覺被告人喺翠竹花園7座9樓B室度出嚟，跟住其中一名關員就想上前搜查被告人，被告人就即刻返番入去嗰個單位度，仲閂埋大門添。當啲海關人員嘗試去打開嗰個--即係破開嗰個鐵閘同埋大門入去嘅時候，就睇到--因為另外有關員係進行監察嘅，咁就睇到被告將個袋就抌咗出去街出面。咁嗰個證人就執番嗰個袋。與此同時，海關人員亦都成功入到去屋入面，就發覺成間屋入面就得被告一個人喺度，咁當時被告係掙扎反抗嘅，試圖係想走，咁不過最後都係畀海關人員捉到、制服到。跟住就搜被告嘅身，喺被告嘅內褲入面就搵到有另外一包嘅、一個密實袋袋住嘅嘢，當時就懷疑係氯胺酮嚟嘅。而另外就喺搜嗰個單位嘅時候，就喺單位入面搵到有兩袋大麻花，同埋仲有其他有少少嘅氯胺酮，同埋有啲包裝嘅工具。咁拉咗被告之後，被告當時就喺警誡之下就話因為驚畀人拉，咁所以就將嗰包嘢掟咗出街，同埋就要求係畀次機會佢嘅。佢亦都同警方嘅人員承認話嗰啲大麻係畀佢自己食用。

後屘政府化驗師將嗰啲證物化驗，咁喺街度執到返嚟嗰個袋入面原來係有七十六個膠袋嘅--分別嘅袋仔，而係入面係有三--即係總共係有429.38克嘅粉末，而含有嘅氯胺酮份量係325.94克。另外喺被告身上內褲度搵到嗰包就其實係有13.29克嘅粉末，而入面係有10.61克嘅氯胺酮，仲有嗰啲大麻花嗰啲咁嘅物品，嗰兩袋係即係化驗咗之後，發覺就係--即係佢哋叫做草本大麻，就係24.59克。而根據警方得到嘅--即係海關方面得到嘅資料，就係所有嘅毒品加埋晒嘅市價係$54,620.24。而被告人你就呢件嘅案件承認所有呢一啲涉案嘅危險藥物，你係管有呢啲嘅物品以作販運嘅用途。

而關於被告你嘅背景，就喺1979年出世嘅，所以而家已經31歲，就唔係初犯㗎喇，有七次嘅刑事嘅紀錄，頭嗰兩次仲係同毒品有關嘅，不過就唔係販運毒品，而你嘅代表律師黃大律師已經係非常之詳盡仔細以書寫嘅形式將所有嘅你嘅背景資料同埋求情理由，同埋有關嘅案例，已經畀咗本席睇㗎喇。我就唔會話太過詳細去覆述番黃大律師所講嘅嘢，就只係好簡單咁講講嘅啫。就話你係屋企裡面就爸爸媽媽就係有兩個細路嘅，有個家姐同埋有你，不過你喺好細個嘅時候，4歲嘅時候，爸爸媽媽就分開咗，而媽媽仲係即係離開咗添，咁所以變咗就即係得番爸爸同埋你哋兩姊弟，咁爸爸又要搵食，就唯有畀阿嫲睇住你，咁所以你細個就根本就即係一路都冇媽媽㗎喇。然後到大個，去到中學，阿嫲年紀太大，所以先至去返同爸爸度住，即係變咗一路都係一個單親嘅家庭度長大。而爸爸因為為口奔馳嘅緣故，所以亦都唔能夠係話太多嘅時間去照顧你兩姊弟，變咗你就自幼生長喺一個家庭度就係缺乏咗呢個足夠嘅家庭教育。

你讀書就係都係讀到去中三就已經冇讀，咁就出嚟做嘢，咁做咗嘢之後就都好年輕就已經係開始即係犯事，因為你1995年就已經係初犯咗事喇嘛，咁你都睇到，你可以。然後就一路睇番嗰個資料就話你爸爸係後屘就係患咗癌症，腸癌。根據呢度嘅資料，即係其實你已經係--即係可以講係愚孝，因為你係因為--即係根據資料喇，起碼，因為睇到你係犯咗一次打劫罪，坐咗40個月嘅監，咁你點解會犯嗰次嘅打劫呢，就因為爸爸係有呢個癌症，需要搵錢去睇醫生，咁你就即係一時心急去搵快錢，就走去打劫，結果就係因為拉到，所以仲去坐咗監添。咁出咗嚟之後，即係爸爸就更加情況差，就做唔到嘢添，咁你自己都仲話已經好後悔，即係嗰陣時咁蠢走去搶劫，咁入去監獄坐咗嗰啲時間，都唔能夠陪到爸爸，咁就出返嚟仲諗住就話會陪番爸爸，就希望又可以搵嘢做，努力賺錢照顧番爸爸，咁你又有做過好多其他嘢，就倉務員、物流咁之類，咁一路--其實佢話呢度--根據個資料就話你都後屘係喺間運輸公司度做，都做得唔錯㗎喇，有成三年咁長，都有成7,000鈫一個月嘅，咁但係後屘就因為唔好彩，爸爸就過咗身。爸爸過咗身之後，就一方面就係後屘因為要有呢一個龕位，要上位，咁而冇錢喇，要成20,000鈫，最基本都要20,000鈫，咁呢個係你其中一個今次鋌而走險咁蠢去犯呢一個販運毒品嘅罪名嘅原因之一，因為想搵錢，又呢個又係同爸爸有關，即係其實嗰陣時已經蠢，去打劫，得過教訓，坐過監，都仲未知道，又再嚟多一次，就係因為去攞個龕位嘅錢，咁呢個就係此其一喇。另外一個理由，係根據律師話畀我知，就因為你已經同--即係一個女士佢都有寫到信上嚟幫你寫求情嘅，即係你未婚妻喇，咁就其實就已經係即係有一路住，就有機會係可以有上到去呢個--即係搬遷，有屋，咁但係又唔夠搬遷費，唔夠錢，咁即係呢一方面令到你係另外一個原因想去即係鋌而走險去賺錢嘅。基於呢兩方面嘅理由，就令到你肯話幫人去帶毒，做拆家咁嚟賺錢。

當然，好似你大律師已經喺求情嘅時候都同我講咗，咁佢都有同你講到就喺呢一類咁樣嘅案件，因為即係事關重大，上訴庭已經畀咗判刑嘅指引，就經濟嘅理由，係因為唔夠錢喇，鋌而走險，唔係一個求情嘅理由係令到法庭可以係輕判㗎，因為毒品對我哋社會嗰個為害係太大。除咗黃大律師已經講咗係即係為你求情，即係話你今次真係好有悔意同埋黃大律師都話睇得出即係你都唔係話一個咁唔顧家嘅人，即係其實你都即係本性都良善，可以咁講，即係雖然以前有呢啲案底。咁除咗你嗰方面，就即係黃大律師所講嘅求情之外，今朝早亦都係有--即係被告人你本身寫咗一封求情信畀我，講到你點樣係後悔同埋就係希望即係今次真係經一事，長一智，就係即係出返嚟之後就會重新做人，咁亦都係有仲非常之支持你嘅未婚妻，即係好明顯發生咗呢件事之後，佢並冇離棄你，仲有就係喺呢一度都為你係寫嗰個求情信嘅，咁同埋就仲好難得係連未婚妻個媽媽，即係你未來外母都肯幫你係寫求情信，就即係講到咗係點樣--即係佢都好唔明--即係起碼喺佢認識嘅你，就同而家突然間發生嘅事都好唔相似 - 即係似乎睇落。你係自從初初犯咗事後，後屘嗰幾年係即係冇再犯事嗰幾年喇，可以咁講，就應該都係嗰個表現係唔錯嘅，起碼畀到你嗰個未來外母睇到係一個即係又孝順、有禮貌同埋心地善良嘅人嚟嘅，咁當然佢哋幾位都係幫你求情喇。另外就呢位神父，呢位神父因為佢其實係喺即係監--喺懲教署度做嘅，咁就係你喺--即係應該係入咗獄之後就先認識佢，咁佢就幫你係求情，即係希望都能夠係你有機會可以即係早日出返嚟嘅。另外仲有就係你嘅好朋友，咁亦都係為你求情，即係基本上大--即係全部人嗰個求情嘅說話都係希望本席係盡量輕判你。

毒品，即係販運毒品係非常之嚴重嘅罪行，已經話咗畀你聽喇，即係喺香港嚟講，上訴庭已經係畀咗量刑指引，係除非係有好獨特嘅理由，法官先至可以唔跟從呢啲指引嘅，而你嘅代表律師亦都好中肯講咗，就喺你呢件嘅案件係並冇呢啲好獨特嘅理由係令到本席可以唔跟從有關嘅指引，咁呢件案件涉案嘅氯胺酮係就有336.55克，咁就已經係過咗300克嘅，喺許守城呢一件嘅案件，300至600克嗰個起點係9至12年，即係話本席要考慮喺9至到12呢幾年嗰個起點之中，去揀一個起點係認為適合嘅。

而就草本大麻嗰方面，就睇番以往一件上訴庭嘅案件，叫做段瑞明（譯音），咁嗰件案件我就唔講佢嘅詳細嘅內容喇，因為基本上嗰件案件上訴庭係睇到呈堂嘅資料，即係關於呢個草本大麻定係大麻精、大麻油嗰啲分別，咁然後畀咗嗰個量刑嘅指引㗎，咁而同呢件案件有關，可以講係因為係草本大麻，咁草本大麻或者係呢個大麻精，上訴庭嘅指引就係如果係販運嗰個份量係喺2,000克以下嘅，咁就可以係判刑去到16個月，咁即係可以睇到喺大麻，即係草本大麻當然相比氯胺酮嗰個判刑係有好大嘅分別喇。亦都我另一方面要考慮，因為喺大麻入面，呢個其中叫做THC嘅元素，就喺大麻油係強過草本大麻嘅。即係換言之，以販運大麻嚟講，而家草本大麻入面所含有呢個有關嘅份量係比較輕一啲嘅，咁呢個當然我會考慮在內，咁而睇番呢個段瑞明呢件案件，因為入面佢哋當時有呢啲專家嘅資料，咁法庭就可以睇到原來500克嘅草本大麻就可以係入到去二千五支煙，因為通常草本大麻係用煙草一齊吸食㗎嘛，咁就本席頭先就要求兩位律師計一計，咁而家係即係大概25喇，我哋二十四點幾，咪即係25喥喇，咁會有幾多支煙，咁佢哋計到就大概係一百二十五支煙，即係話一條煙都唔夠喇，一條煙有二百支，咁而被告你本身你都同意係嗰個數目都係咁上下，都啱㗎喇。

喺法庭要處理一個販運毒品或者危險藥物嘅罪行，而喺呢個罪行入面係涉及多過一種危險藥物，法庭係有兩個唔同嘅做法可以考慮嘅，一個就係獨立嘅做法，即係話睇番每樣嘅危險藥物，睇番嗰個危險藥物嘅份量，然後就做一個量刑起點，然後就各有各，咁然後加埋佢，再做一個混合嘅量刑起點。另一個做法就係一早已經做一個混合嘅做法喇，呢個混合嘅做法就係睇譬如兩個或者至三個嘅唔同嘅毒品，咁揀咗最嚴重嗰個先，即係罪行係最嚴重嗰個就做個起點，然後就喺個起點嘅時候就酌量係增加，就係話其他仲有啲乜嘢嘅唔同性質嘅毒品，咁就兩個做法都得嘅。

而另外有兩位上訴嘅法官喺一件案件叫做高家興（譯音），係2009年嘅案件，係4 HKLRD 856嘅呢件案件。咁嗰件案件，呢兩位法官係喺考慮判刑嘅時候，佢哋就畀咗個意見，就話一般嚟講，如果嗰兩樣嘅毒品係好唔同嘅，咁就似乎係用呢一個混合嘅做法就會比較適合啲，但 -- sorry，對唔住，掉轉咗，應該係話如果嗰兩樣嘅毒品唔係好唔同嘅，即係大家都好嚴重㗎喇，咁就用混合喇，但係如果係好唔同嘅，即係嗰個性質係爭好遠嘅話就應該會用番分開嘅做法會好啲，即係呢個係嗰個建議嚟㗎喇，即係喺嗰個上訴庭度。

喺呢件案件，如果用番呢一個建議嚟睇，就氯胺酮同草本大麻即係好唔同喎，即係性質真係好唔同喇，即係食法又唔同，嗰個對人嘅影響又好唔同，咁就似乎係用番嗰個分開嘅做法係會比較適合啲。咁就首先睇咗氯胺酮先喇，咁氯胺酮其實而家就啱啱過咗300克嗰個位喇，因為300克以下嘅話就唔係用9年至12年呢一個起點，咁喺呢個範疇入面，本席要考慮一個量刑起點嘅時候，咁就要考慮到--當然好大部分就考慮到求情嘅理由，喺呢件事件，即係你係為咗咩嘢事去干犯呢個嘅控罪，咁其實你係有兩次同毒品有關㗎喇，不過我又考慮到你嗰兩次唔係話去販運毒品，即係好明顯即係自己食用毒品嘅，同埋嗰陣時都好細個下，响1995年嘅事，咁本席喺考慮嘅時候就考慮埋呢兩樣。仲有就係雖然喺拉你嘅時候都係唔係咁好㗎喇，因為又走入屋、又閂埋門、又去作出呢個反抗，不過都考慮晒呢啲所有嘅情況之下，我都認為一個9年嘅量刑起點已經係足夠㗎喇，咁所以就呢個氯胺酮嗰方面，我就用番最低呢一個量刑起點，9年。好喇，睇番呢個草本大麻喇，咁考慮到佢係24.59克，即係差唔多25克，咁都考慮晒所有嘅情況之後，我就認為一個兩個月嘅量刑起點係適合嘅。

我考慮咗一方面就9年，一方面就係兩個月，以一個整體嚟計，本席都認為一個9年嘅量刑起點已經夠喇，所以我都係用9年嘅量刑起點，即係我唔另外再加嗰兩個月上去。你係一早已經承認控罪，當然係可以得到呢個三份一嘅刑期扣減嘅，因此就呢一個嘅罪行，以9年做量刑起點，減咗三分一嗰個刑期扣減之後，嗰個判刑就係6年。