香港特別行政區 訴 黃智勇及另一人

DCCC1278/2010

香港特別行政區

區域法院

刑事案件2010年第1278號

----------------

----------------

----------------

判刑理由書

----------------

1.第一被告係被控：一，一項為不道德目的而唆使他人，違反香港法例第200章《刑事罪行條例》第147（1）（a）條，指第一項控罪；二，一項刑事恐嚇，違反香港法例第200章《刑事罪行條例》第24（a）（ii）及27條，指第二項控罪。第二被告係被控：一，一項導致另一人賣淫，違反香港法例第200章《刑事罪行條例》第131（1）（a）條，指第六項控罪。兩名被告共同被控：一，一項導致另一人賣淫，違反香港法例第200章《刑事罪行條例》第131（1）（a）條，指第三項控罪；二，兩項控制另一人而目的在於使該人賣淫，違反香港法例第200章《刑事罪行條例》第130（1）（b）條，指第四、七項控罪；三，兩項倚靠他人賣淫嘅收入為生，違反香港法例第200章《刑事罪行條例》第137（1）條，指第五、八項控罪。

2.第一被告係承認第一、三、四、五、七和八項控罪及同意案情，故裁定其罪名成立。因控方申請將第二項控罪存檔，除法庭批准，不得繼續檢控。第二被告係否認控罪，經審訊後被裁定第六、七、八項控罪，罪名成立。

案情

3.2010年3月，女子X被經網上認識嘅李姓男子游說從事色情電話工作，其後再提議她從事賣淫工作。當X表示不願意時，第一被告恐嚇將X曾參與色情電話工作嘅資料於網上發放，以逼使X從事賣淫工作。此後，有人在網上登賣淫廣告，與客人聯絡和議價後，第一被告負責帶X到相會地點提供性服務，期間，第一被告抽取X賣淫所得，當中一次嘅會面涉及喬裝嫖客嘅警員。X後來決定不繼續賣淫和接聽第一被告嘅電話，並返回內地。4月12日，X回港，並收到第一被告發給她的短訊，促使佢聯絡，X報警求助。

4.2010年3、4月間，女子Y在MSN嘅聊天室認識咗第二被告，二人後成為情侶，其後經第二被告游說下，Y加入其公司參與援交活動，提供性服務，與第二被告分賬。其後，第一同第二被告在網上登賣淫廣告，用電話與客人聯絡和議價，期間，兩名被告為Y安排客人和交易地點，第一或第二被告都曾陪同Y到會面地點，兩名被告抽取Y賣淫所得。Y最終在8月份決定離職，並沒有再與兩名被告聯絡。2010年9月21日，警方拘捕咗第一和第二被告，及喺第一被告家中取走賣淫紀錄。警誡下，第一被告承認有關X嘅控罪。

求情

5.第一被告現年係20歲，未婚，同家人同住，被告過往冇任何嘅刑事紀錄。中五畢業離開學校之後，曾經任職售貨員、跟車工人及廚房學徒，被捕前無業。被告承認控罪，表示悔意。鑒於其年紀及背景，喺考慮判刑前，為其提取一個教導所報告。其教導所報告指出，在其成長階段，其父母都要外出工作，致對其疏於管教，升上中學後，學業一直遜色，重讀中四後，會考成績亦不如理想。離校後開始工作，喺2010年3月再遇上舊朋友（第二被告），喺第二被告主動下，因為貪玩和貪搵快錢，干犯咗本案。報告建議一個法定監管紀律訓練，可以加強被告嘅守法意識。

6.辯方求情就指，報告已向被告解釋，其亦同意有關嘅內容，望法庭採納被告嘅建議，判處教導命令。

7.第二被告現年係20歲，未婚，與家人同住，被告過往有兩個刑事紀錄，均為與未成年女童發生性行為，為此分別被判處感化令同更生中心令。被告中四畢業之後，任職髮型學徒，被捕前無業。鑒於佢嘅年紀及背景，喺考慮判刑前，為其提取一個教導所嘅報告。其教導所報告指出，在其成長階段，其父母因健康問題，未能給予有效嘅管教，更甚嘅係因其係家中唯一男丁而溺縱佢。被告學業成績不佳，喺2003年被發現患有精神問題和腦癎症。2005年至2007年期間先後犯案，同接受唔同性質嘅輔導監管同紀律訓練，惜最終亦回復往日嘅任性行為。2010年初辭工之後一直待在家中，不事生產，為貪搵快錢，邀請第一被告一齊犯案。報告建議一個法定監管紀律訓練可以加強被告嘅守法意識。

8.辯方求情就指，報告已經向被告解釋，其亦同意有關內容。家人方面希望法庭能採納建議，判處教導所命令，但表示被告本人話自己有精神病，希望法庭可以考慮醫院令或者係監禁嘅刑罰。注意，教導所報告係有提及被告嘅精神健康問題背景，並喺咁樣嘅前提之下係作出建議。另外，辯方所呈交嘅醫學報告亦都顯示，2003年之後，有關嘅病情係已穩定嘅。

9.喺家人嘅求情信入邊得知，被告平日喺家中表現係懶散，亦都係怕吃苦，被告初表示唔願意到教導所，我相信一定程度係同佢慣於懶散係有關嘅。喺本席押後考慮其判刑期間之後，被告就再向本席表示，希望可以畀一個機會佢，判佢就係一個教導所命令。

10.喺量刑方面，咁第一被告係同他人一同策劃，利用少女入世未深、道德觀念薄弱、貪搵快錢嘅弱點，喺網上結識咗X同Y之後，教唆二人賣淫，分別促使二人成為娼妓，當中涉及脅逼嘅手段，二人係有計劃咁利用網絡服務刊登廣告，為X及Y招徠客人，使用手提電話與客人聯絡，安排喺唔同嘅賓館作為交易地點，控制、指使同影響住X同埋Y，使兩名少女去賣淫，從而收取係約七成賣淫所得。X及Y嘅總賣淫所得係超過四十萬，咁期間，第一被告係帶同X喺公眾地方唆使他人接受X嘅賣淫服務。

11.我注意涉及X嘅控罪，第一被告係曾經恐嚇喺網上發放X曾參與色情電話工作資料，令到X係被逼屈從。咁我認為就第三同埋第四項控罪嘅合適量刑起點應為30個月，咁考慮到第五項控罪只涉及四日嘅賣淫收入，咁我認為合適嘅量刑起點應為12個月。而就第一項嘅為不道德目的唆使他人罪，我認為合適嘅量刑起點應為6個月。咁注意有關Y嘅控罪係冇涉及到威脅嘅，咁我認為第七項控罪嘅合適量刑起點應該係27個月，亦都考慮到第八項控罪涉及四個月嘅賣淫收入，收取總數超過三十萬，我認為合適嘅量刑起點應該係18個月嘅。

12.我認為整體嘅罪責，喺認罪之下，我應該考慮嘅判處係30個月嘅監禁，咁但係我注意到被告現年係20歲，過往佢係冇任何嘅刑事紀錄，咁被告同意佢教導所報告嘅內容，願意接受教導所嘅命令，改過自新。報告入邊嘅資料亦都顯示，被告嘅守法意識係薄弱，容易受朋輩影響，貪搵快錢。詳細考慮之後，我認為教導所提供嘅紀律訓練，再加埋其後嘅監管係最適合嘅判罰，可以加強佢嘅守法意識，咁就認清正確嘅人生觀，學習努力、誠實咁樣樣生活，係改過自新嘅。

13.而第二被告方面，第二被告就同第一被告係一同策劃，係利用Y入世未深、道德觀念薄弱、貪搵快錢嘅弱點，係結識咗Y之後，先由第二被告建議佢做援交少女，促使佢成為娼妓，二人係有計劃咁利用網絡服務刊登資告，為Y招徠客人，使用手提電話同埋客人係聯絡嘅，安排喺唔同嘅賓館作為交易地點，控制、指使同埋影響住Y，使佢賣淫，從而係收取約七成Y嘅賣淫所得。

14.咁我注意第二被告並冇就係威脅Y嘅，咁我認為第六同埋第七項控罪嘅合適量刑起點應該係27個月，我亦考慮到第八項控罪涉及四個月嘅賣淫收入，收取嘅總數超過三十萬，咁我認為合適嘅量刑起點應該係18個月。

15.第二被告佢係經過審訊之後定罪，咁我認為就整體嘅罪責，我應該考慮嘅判處係超過30個月嘅監禁，咁但係我注意到被告現年係20歲，過往佢係冇相同嘅刑事紀錄，咁被告佢係同意教導所嘅報告內容，現在佢係願意接受呢一個教導所嘅命令去改過自新嘅。報告嘅內容入邊嘅資料亦都顯示，被告嘅自控能力係低、守法嘅意識係薄弱、冇正確嘅人生目標、貪搵快錢，我詳細考慮之後，我認為教導所所提供嘅紀律訓練，再加埋其後嘅監管係最適合嘅判罰，可以加強佢嘅守法意識，認清一個正確嘅人生觀，學習努力、誠實生活，改過自新。咁教導所方面係知道被告佢係有精神病同埋腦癎症嘅歷史，我相信係會畀佢一個適當嘅治療，有需要嘅時候。

16.咁就命令方面，第一被告嘅第一、三、四、五、七、八項控罪，各判處教導所命令，係同期執行嘅；第二被告嘅第六、七、八項控罪，係判處教導所命令，亦都係同期執行嘅。