香港特別行政區 訴 劉曉莉

HCCC365/2010

香港特別行政區

高等法院

原訟法庭

刑事案件2010年第365號

----------------

----------------------

判刑
以下內容乃法庭數碼錄音謄本

----------------------

官：　　被告係被控一項非法販運危險藥物罪，被告係否認控罪，喺審訊之後，陪審員係以大比數嘅決定裁定被告人罪名成立嘅。

本案所涉及嘅毒品有兩款，即係495克嘅海洛英鹽酸鹽與及119克嘅乙酰嗎啡鹽酸鹽。

被告今年28歲，係內地人，佢喺香港係並冇任何刑事紀錄。代表辯方嘅大律師喺求情時呈交咗兩封信件畀法庭參考，第一封係被告自己寫嘅，內容主要係重申話佢真係無辜嘅，佢希望法官可以幫佢係還佢清白。

呢一件案件係經審訊後由陪審員作出咗裁決，到咗呢個階段，法官只能夠根據裁決去判刑。當然，針對定罪嘅裁決，如果被告不服，佢係有其他途徑去處理嘅，相信代表佢嘅關大律師已經係解釋咗畀佢聽㗎喇。

至於另一封嘅求情信本席亦都閱讀過內容，咁係話由佢公司老闆係替佢寫嘅一封求情信，咁信裡面講到佢係無知、單純或者係貪啲小便宜呀，畀人利用咁樣，就希望法官能夠網開一面。

根據上訴庭對呢一類案件嘅判刑指引，呢個份量嘅海洛英會係屬於判15到20年嘅判刑範圍。本案嘅被告人從內地去馬來西亞，將毒品帶返嚟香港，再準備運返去廣州，因此案情係涉及呢個國際嘅因素，而呢一點係加重本案呢個嚴重性嘅情節。

就毒品嘅性質方面，辯方認為雖然同意案情嘅第9段說明咗化驗師嘅講法，係控罪所指嘅兩款毒品都可以統稱為嗎啡酯鹽，但係佢哋嘅毒性是否相同就並唔係好清楚嘅。而劉德明嘅案例就只係針對海洛英而訂下嘅，至於乙酰嗎啡呢，就似乎冇特別嘅指引喇。但係控方嘅意思就係話，呢兩種毒品都可以根據劉德明去處理。

本席同意，基於第9段嘅同意案情，本席係難以決定話呢兩種嘅毒品一定有相同嘅毒性。無論如何，就單以約500克嘅海洛英嚟講呢，刑期已經係比較高㗎喇，就算我哋係分開兩項控罪嚟處理，考慮到整體刑期，最後都可能會係將刑期作同期執行。喺咁嘅情況之下，本席決定以約500克嘅海洛英做判刑嘅基礎，但係本席要講明，呢一個做法係基於本案嘅個別情況，就唔可以當為先例嘅。

另一方面，本席都係需要考慮到國際因素嘅問題，經考慮後，本席會採用18年作為量刑嘅基準，本席睇唔到有其他有效嘅求情理由去減低呢個刑期，因此刑期係18年。

有關向上訴法庭提出的相關上訴，請參閲CACC296/2011。