香港特別行政區 訴 江志遠

HCCC92/2011

香港特別行政區

高等法院

原訟法庭

刑事案件2011年第92號

----------------

----------------

------------------------------------

判刑

以下內容乃法庭數碼錄音謄本

------------------------------------

官：　被告喺聆訊之後被裁定一項強姦罪，罪名成立。

被告喺事發前兩三個月先認識本案嘅受害人，只係普通朋友關係。當晚受害人同被告傾訴一啲感情困擾之後，同被告一同返回被告屋企，係意圖攞USB手指同埋玩電腦，但係當受害人想離開嘅時候，遭到被告游說佢留低，話「瞓醒一齊出門口」，受害人不虞有詐，瞓上被告張床之後，不久被被告強姦，當時受害人係啱啱夠16歲。

被告現年21歲，過往並冇刑事紀錄。代表被告嘅大律師強調，今次嘅事件對被告已經係一個莫大嘅教訓，本案並不存在對受害人禁錮、使用暴力等令案情情節嚴重嘅因素，故此大律師希望本席能夠採納一個最低嘅起刑點。

被告對事件冇承擔、冇悔意。受害人事後同朋友去被告屋企，聲稱討回公道，但係遭到被告以及屋企人出言侮辱之後，先至不忿報警，而受害人需要挺身而出，喺庭上重溫慘痛經歷，並且面對一啲令佢極度難堪嘅不實指控。被告喺事件中冇使用安全措施，而受害人嘅年紀亦都係屬於年輕。

本席認為五年半嘅起刑點係合適，喺聆訊之後被定罪，不獲任何扣減，判刑五年半。

有關向上訴法庭提出的相關上訴，請參閲CACC389/2011。