香港特別行政區 訴 周俊生

HCCC439/2010

香港特別行政區

高等法院

原訟法庭

刑事案件2010年第439號

----------------

----------------------

判刑
以下內容乃法庭數碼錄音謄本

----------------------

官：　被告喺聆訊之後被裁定一項強姦罪罪名成立，違反香港法例第200章《刑事罪行條例》第118（1）條。

根據案情，被告喺提供「冰」毒畀一名15歲嘅女童吸食之後，禁止佢離開佢嘅住所，並且強逼女童為佢口交，並強姦女童。

被告現年36歲，有十五次嘅刑事紀錄，最後一次係喺2011年3月22號因為販運危險藥物、管有危險藥物、襲擊警員等控罪被判監禁三年十個月，與佢之前有關嘅刑期一齊服嘅四年多嘅刑期。

大律師喺求情嘅時候表示被告係獨居，中二就輟學。大律師表示案情顯示女童嘅創傷不大，而本次事件嘅情節並非同類事件中最惡劣，希望本席會予以輕判，並且考慮到佢正在服頗長嘅刑期，下令部分嘅刑期同期執行。

本席考慮到本案嘅案情，亦都考慮咗被告人正在服嘅刑期。事實上係喺個有關其他嘅控罪，即係話管有危險藥物同埋販運危險藥物，係被告干犯本案之後，但係就住本案被捕之前干犯嘅，本席亦都考慮咗大律師嘅求情。被告喺本案中對事件既冇承擔，亦都冇悔意，令致受害人需要挺身而出舉報佢以及喺庭上重溫慘痛嘅經歷，並且面對一啲令佢極度難堪嘅不實指控。

本案涉及年輕嘅受害人，受害人當時只得15歲，被告以毒品誘使佢前往佢嘅住所禁錮佢，向佢使用武力。喺事件中亦都冇使用安全措施，呢啲全部係令案件情節嚴重嘅因素，本席認為一個7年嘅起刑點係合適嘅。喺聆訊之後被定罪，不獲任何扣減，不過考慮到佢正在服刑嘅刑期，下令7年刑期當中嘅18個月同佢正在服嘅刑期同期執行。

有關向上訴法庭提出的相關上訴，請參閲CACC262/2011。