香港特別行政區 訴 吳笑蘭

HCCC304/2011

香港特別行政區

高等法院

原訟法庭

刑事案件2011年第304號

----------------

----------------------

判刑
以下內容乃法庭數碼錄音謄本

----------------------

官：　被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指被告喺落馬洲入境之後被警員截查，發現佢嘅前腹及後腰間共收藏咗四包毒品，被告承認毒品係「K仔」，但係當時指佢係自用嘅。

毒品經過化驗之後，證實為1公斤嘅粉末，內含840克嘅氯胺酮。佢嘅價值，當時嘅零售價係港幣113,000元。

被告現年52歲，曾經有九項嘅刑事紀錄，當中有八次涉及毒品。喺1994年3月，因為販運危險藥物而曾經被判入獄5年，佢最後一次嘅刑事紀錄係喺2010年8月27號，因為盜竊罪而被判罰款嘅。

大律師喺求情嘅時候表示，喺本案最大嘅求情因素係被告坦白認罪、有悔意，另外被告嘅身世亦都惹人可憐，希望法庭能夠輕判。

本席喺量刑嘅時候考慮咗本案嘅案情、毒品嘅種類、重量，以及有關嘅量刑指引，被告承認控罪，亦都考慮咗大律師嘅求情，以及閱覽咗有關嘅求情文件。

根據許守城一案嘅指引，販運600至到1,000克嘅氯胺酮，起刑點係由12年至到14年。本案涉及嘅係840克氯胺酮，另外加上跨境犯案呢個令案情嚴重嘅因素，本席採納十三年半作為起刑點，予以三分之一嘅認罪扣減，判刑9年。

有關向上訴法庭提出的相關上訴，請參閲CACC487/2011。