官： 兩名被告，我稱佢哋為D1、D2，經認罪之後被裁定以下各項罪名成立。D1：一項嚴重入屋犯法（即係公訴書裡面嘅控罪九）、一項管有危險藥物（即係公訴書裡面嘅控罪十），與及三項入屋犯法（即係公訴書裡面嘅控罪一、四同五）；而D2則為一項入屋犯法（即係控罪書控罪九嘅交替性控罪）同一項處理贓物（即係控罪書裡面嘅控罪六）。
案情方面，控方已經較詳細咁讀出過，我唔會覆述。好簡單講，警方喺一棟大廈外將兩名被告截停，調查後發覺佢哋剛喺一個1樓嘅單位內偷取東西，而當時D1喺D2不知情下攜有一支氣槍，呢個就係控罪九。後來，D1被警方搜屋，被發現藏有控罪十所指嘅已淨含毒量計，一共6.03克嘅「冰」。警誡下，D1又承認犯下控罪一、四、五所指嘅三次入屋盜竊。至於D2，佢亦喺警誡下承認曾替D1典當一批或者非法得嚟嘅首飾。
D1現年34歲，香港出生及受教育至中五程度，曾經做過機械維修，被捕嗰時失業嘅，與D2係男女朋友關係，佢冇任何刑事定罪紀錄。D2現年41歲，大陸出生及受教育至大專程度，03年嚟香港，07年離婚之後以賣淫為業，佢冇任何刑事定罪紀錄。
求情時，律師指D1年輕、冇前科，只係因為失業受大打擊先開始吸毒，致走上歧途。至於D2，律師則話佢係因為D1嘅主使，先會犯下有關嘅罪行。但係喺我嘅澄清之下，律師亦好公道咁承認，D2涉案係完全自願而唔係被逼嘅。總括而言，我認為無論D1定D2，除咗認罪之外，都冇其他有效嘅求情理由。
綜觀一切有關嘅情況，我認為就D1而言，控罪九（嚴重入屋犯法）嘅量刑基準應該係三年半、控罪十（管有危險藥物）則應為12個月，並且因為冇證據顯示有販運嘅潛在風險而維持喺嗰個水平、控罪一、四同五（三項入屋犯法）因為涉及一個商業同埋兩個住宅單位，就分別係兩年半同埋三年。由於被告認罪，以上各個基準就照慣例下調三分一，仲有控罪四同控罪五係同日發生於同一棟大廈嘅兩宗案件，呢個我亦冇忽略嘅。總括而言，對D1嚟講，我認為以下嘅最終刑期合適，而且考慮到數罪並罰不能過重呢個原則㗎喇，就係控罪一，20個月；控罪四同五，各自24個月；控罪九，28個月；控罪十，8個月。此外，控罪四、五同十，同期執行，與其他各罪則分期執行。即係合共72個月（或者6年）。
至於D2，佢唔知D1有氣槍，所以控罪九對佢只係一項普通嘅入屋犯法，而且係涉及商業單位，所以量刑基準只係較低嘅兩年半。此外，控罪六（處理贓物）則應該係18個月。D2認罪可得三分一嘅扣減，就下調至20個月同1年，而兩個控罪係完全獨立嘅事件，所以得出嘅結果就應該分期執行，而且最後嘅刑期我亦唔認為過重嘅，我宣判D2須為控罪六同九分別入獄1年同20個月，即合共兩年零八個月。