香港特別行政區 訴 鄭家維

HCCC204/2011

香港特別行政區

高等法院

原訟法庭

刑事案件2011年第204號

----------------

----------------

主審法官：　高等法院法官潘敏琦

日期：　2011年11月11日上午9時36分

----------------------

判刑
以下內容乃法庭數碼錄音謄本

----------------------

官：　被告承認一項與年齡喺16歲以下嘅女童非法性交罪，違反香港法例第200章《刑事罪行條例》第124（1）條。

案情指，事發嘅時候，被告24歲，係女童表姐嘅男朋友，而女童當時係未滿16歲嘅。雖然見過被告同表姐一齊，但係佢唔知道被告同表姐嘅關係。被告喺網上嘅聊天室談及自己係甜品同埋蛋糕嘅師傅，咁後來二人相約見面，談及做甜品嘅事宜。

事發當日，女童隨被告去到被告屋企，一抵達，被告就將佢推倒喺沙發上，除咗佢嘅上衫同埋牛仔褲，將佢扯入房，同佢發生咗性行為，期間佢並冇使用安全套。

被告現年26歲，過往冇刑事紀錄，佢自從2009年成為甜品師傅之後，月入大概係7,000至到10,000鈫，一向都有穩定工作。

大律師呈上多份求情信件，指認識被告嘅人均認為佢係為人斯文有禮，對佢干犯本案深表詫異。大律師又指，被告同女童嘅表姐感情要好，但係後來認識咗女童，兩個人投契，之前亦都單獨約會過數次，而呢次係佢一時愚蠢，讓慾念蓋過理智，先至發生性行為嘅，而期間佢真心相信女童係願意同佢進行性行為。被告嘅背景報告內容亦都同大律師所講嘅求情說話大同小異，被告對於干犯控罪表現內疚同埋後悔。

根據受害人嘅創傷報告，佢對於被性侵犯嘅陰影係仍然存在、自責、壓抑以及不安，自我形象偏低，顯示創傷猶在。可幸係佢屋企人對佢好支持，佢現在已經比較能夠放開懷抱、接受現實及面對將來，現在亦都毋須接受心理輔導。

與未滿16歲嘅女童進行性行為嘅法例，最高嘅判罰係5年監禁。法例係保障未夠年齡，即係心智發展未完全成熟嘅女童，免佢哋被人剝削、利用。控罪嘅嚴重性係應該喺量刑嘅時候反映，阻嚇性嘅訊息係清晰、明確嘅，以反映社會大眾對呢一啲行徑嘅不恥以及憎厭。然而案例顯示，被告與女童嘅年齡差別愈大，以及被告濫用自己身分，侵犯未成年少女，均係令案情情節嚴重嘅因素。

喺本案中，女童事發嘅時候係差不多14歲，本案唔涉及使用暴力或者濫用身分，但係被告同女童嘅年齡係有差不多十年嘅距離，呢個情況與年齡相若、血氣方剛、一時衝動嘅青少年男女朋友嘅情況係有所區別。

本席認為，本案嚟講，適合嘅起刑點係18個月，本席以此作為起刑點，予以三分之一嘅認罪扣減，判刑1年。