香港特別行政區 訴 譚子杰

HCCC358/2011

香港特別行政區

高等法院

原訟法庭

刑事案件2011年第358號

----------------

----------------

主審法官：　高等法院法官潘敏琦

日期：　2011年11月16日上午9時45分

控罪：　販運危險藥物（Trafficking in a dangerous drug）

----------------------

判刑
以下內容乃法庭數碼錄音謄本

----------------------

官：　被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，關員喺街上睇到被告攞住個膠袋，尾隨跟蹤、截查佢，並且喺個袋內發現咗一個藏有氯胺酮嘅罐。被告喺警誡之下表示，啲毒品係氯胺酮，佢正在替人攞到後樓梯放置。

而毒品經過化驗之後，證實為0.99公斤嘅粉末，內含0.54公斤嘅氯胺酮，當時嘅零售價為港幣十萬九千多元。

被告現在係17歲，過往有過一次嘅刑事紀錄，喺本年4月20號被判十八個月嘅感化令，本案係喺感化令生效大約個多月之後干犯嘅。

大律師喺求情嘅時候表示，被告尚算年輕，係被不良份子唆擺，自己受不住金錢獲益嘅引誘而鋌而走險，佢對於事件已經深感後悔，亦都後悔冇珍惜上次法庭給予佢感化令嘅機會。但係就住本案，佢已經第一時間認罪，亦都同海關充份合作，希望本席可以盡量輕判。

本席喺量刑嘅時候考慮咗本案嘅案情、毒品嘅種類、重量以及有關嘅量刑指引；被告認罪，亦都考慮到大律師嘅求情，及閱讀咗被告母親及表姐撰寫嘅求情信。

根據許守城嘅案例量刑指引，販運300至到600克嘅氯胺酮嘅起刑點係9年至到12年。考慮咗本案所有有利於被告嘅求情因素，就住本案所涉及嘅540克氯胺酮，本席採納11年嘅起刑點，予以三分之一嘅認罪扣減，判刑88個月，七年四個月。

另外，就住佢違反上一單案件嘅感化令，不另作處理。