香港特別行政區 訴 李靜雯

HCCC305/2011

香港特別行政區

高等法院

原訟法庭

刑事案件2011年第305號

----------------

----------------

主審法官： 高等法院法官潘敏琦

日期： 2012年1月30日上午9時50分

控罪：販運危險藥物（Trafficking in dangerous drugs）

----------------------

判刑
以下內容乃法庭數碼錄音謄本

----------------------

官：　

被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，被告喺一個屋苑外被警員截查，喺佢手持嘅膠袋內搜獲多包嘅毒品同埋一啲片劑。被告喺警誡下指毒品係一名巴籍男子畀佢嘅，佢正在按照指示運送該些毒品，佢將會獲得港幣2,000元嘅報酬。

毒品經過化驗之下，證實為8.50克晶狀固體，內含8.22克甲基苯丙胺鹽酸鹽，以及5.50克固體，內含4.76克可卡因，以及七百八十片內含5.23克嘅硝甲西泮片劑。本案所有嘅毒品當時嘅市值約46,939元。

被告現年26歲，喺2006年曾經因為兩項販運危險藥物罪，被判總數為六年多嘅刑期，佢喺2010年1月2號刑滿出獄。

大律師指被告最大嘅求情因素係佢喺本案中選擇坦白認罪，然而不容忽視嘅，係佢喺對上一次犯同類案件入獄之後，出獄一年多便干犯本案。大律師指佢出獄後仍有毒癮，又希望幫朋友還卡數，所以選擇咗愚蠢嘅方法去賺快錢。大律師懇求本席能夠網開一面，予以輕判，令被告可以早日獲釋，重新做人。

本席喺量刑嘅時候考慮咗本案嘅案情、牽涉嘅毒品嘅種類、有關嘅毒品嘅重量、以及量刑指引、被告認罪，以及大律師嘅求情，亦都閱讀咗被告以及其他機構撰寫嘅求情信。本案涉及三種毒品，分別為「冰」毒、可卡因，以及硝甲西泮。上訴庭喺黃健球案中指出，喺判刑上硝甲西泮係沿用氯胺酮嘅量刑指引，而多於一種毒品嘅量刑多以綜合方向處理。喺本案所涉及嘅三種毒品中，主要嘅毒品係8.22克嘅「冰」毒，而較輕嘅係氯胺酮。將所有嘅毒品總重量計算在一起嘅總重量係18.21克，如果將所有嘅毒品當作「冰」毒看待，起刑點係納入10至到70克，即係7至到10年嘅界別，起刑點大概係7年。然而將所有嘅毒品假如當作氯胺酮看待，起刑點係納入10至到50克，即係4至到6年嘅界別，起刑點約為四年半。喺呢一個基準下，再加上藥物嘅混合性可以提高藥力嘅考慮之下，本席認為一個6年嘅起刑點係適合嘅。

本案存在住特別嘅因素令本席能夠寬大處理，最後本席宣佈係判刑三年四個月，即係大概係百分之四十五嘅量刑扣減。