被告承認一項企圖與年齡在13歲以下嘅女童非法性交罪，違反香港法例第200章《刑事罪行條例》第123及159G條。
被告係女童祖母嘅同居男友。事發當日，女童同被告單獨在家，女童同被告玩美少女戰士，被告扮演怪獸、壞人，後來佢哋進入女童父親嘅房間玩除褲遊戲。被告企圖同女童性交，並舔佢嘅私處。女童父親返家嘅時候，叫被告離開房間之後，發現女童冇穿著內褲，而事發嘅時候，女童嘅祖母一直喺自己嘅房間瞓覺。
被告現年52歲，之前並冇刑事紀錄。大律師喺求情嘅時候指，被告坦白認罪，省卻女童出庭作供，而今次嘅事件係並冇預謀，係被告一時歹念，將與女童祖母嘅十八年關係一手摧毀，佢深感悔意同埋內疚，並藉此公開向女童以及女童嘅家人致歉。
本席喺量刑嘅時候，考慮咗大律師嘅求情、本案嘅案情。有關被告嘅報告顯示，被告並冇精神或心理嘅問題，亦都冇孌童癖好。心理專家評估，認為被告嘅自我形象低落，有可能喺未能與女友性關係得到滿足，而以女童作洩慾對象；佢不懂處理各種嘅壓力，適應能力同埋自制能力低，先至干犯今次嘅罪行。心理專家認為，佢重犯性罪行嘅風險屬低，但係對自己犯罪行為嘅洞察力流於表面。
本案嘅女童喺事發嘅時候只係得五歲零八個月，被告侵犯稚女嘅行為係猖獗同埋卑劣，呢一點係令本案嘅案情尤為嚴重。法庭喺判刑嘅時候，絕對有必要發出鏗鏘嘅訊息，就係呢一類案件嘅被告必須獲嚴懲，以反映公眾對呢一類案件嘅厭惡，以儆效尤。
根據女童嘅創傷報告，呢件事件對佢心理有一定程度嘅影響。當佢提及本事件嘅時候，佢表現緊張、焦慮不安及尷尬，亦都對自己喺事件中應負嘅責任感覺有所扭曲以及誤解，需要接受心理輔導。明顯地，本事件對女童嘅心理肯定影響深遠。雖然被告聲稱係一時衝動，先至犯下今次嘅事件，但係無疑佢嘅作為係令人髮指。性侵犯年幼兒童嘅人，不論年齡，就算過往紀錄良好，不能倖免於阻嚇性嘅刑期。
本案已經考慮咗關海一案，該案涉及肛交及與未成年少女發生性行為罪。上訴庭清晰咁指出，由於有關該案發生嘅時候，女童只有3歲到5歲，上訴庭認為一個13年總起刑點係合適嘅。
本席已經考慮過所有有利於被告嘅因素，本席以9年作為本案嘅起刑點，予以三分之一嘅量刑扣減。由於被告盡早認罪，免卻女童作供，另外予以6個月嘅扣減。判刑五年半。