香港特別行政區 訴 林興

HCCC138/2012

香港特別行政區

高等法院

原訟法庭

刑事案件2012年第138號

----------------

----------------------

判刑
以下內容乃法庭數碼錄音謄本

----------------------

官：　

被告係被控三項控罪嘅，都係電梯行劫案嚟嘅。被告承認罪名，亦都同意案情撮要。

簡單嚟講，被告喺2011年5月16日、6月13日以及7月13日，分別喺觀塘同紅磡地區嘅商業大廈電梯裡面打劫剛攞咗錢嘅單身女士，每次行事被告都有用刀指嚇受害人，搶錢之後就逃走。被告嘅犯案過程，部分係有被閉路電視錄到，亦都有兩名受害人係認出被告人嘅。被告喺被拘捕之後，都有同警方合作，咁係直接承認咗後兩次嘅搶劫罪。

被告今年已經係67歲，有二十多次嘅刑事紀錄，其中幾次都係同搶劫有關。

代表被告嘅范大律師喺求情嘅時間指出，被告係喺香港獨自生活嘅，仔女都係成年人嚟㗎喇，居住喺內地，咁范大律師就提出話，被告決定喺服刑之後，佢會返番大陸生活，就唔再犯法喇。

本案嘅案情顯示，被告對選擇犯案嘅時間、地點、鎖定受害人及出手嘅方法，都係有預先設計嘅，絕非一時衝動下嘅行為。本席要接納嘅係，佢並冇真係出手傷人，但係佢以單身女性為目標，咁睇嚟佢都不必真係要傷人，先可以達到搶錢嘅目的。以被告咁嘅年紀嚟講，佢都仲要鋌而走險去犯案，本席懷疑係因為佢有呢個吸毒嘅問題，亦明顯係出於一份嘅貪念。就以5月16號嗰件案嚟講，佢已經係搶咗兩萬幾鈫，但係之後佢再接二連三咁樣犯案嘅。

本席已經閱讀過控方呈上嘅有關案例，即係茆廣生（[1981] HKLR 610）、溫永德（譯音）（[1994] 1 HKCLR 191）、趙平基（譯音）（CACC 476/2001）。

綜合考慮本案嘅案情同埋被告嘅情況後，本席係決定以6年作為每項控罪嘅基準，本席會因被告認罪而減免三分之一，咁變成每項都係4年。

考慮到整體刑期方面，本席會作出以下嘅命令：第二項嘅1年與第一項嘅4年分期執行，第三項嘅1年就與第一及第二項嘅刑期分期執行，刑期即係總共6年。

有關向上訴法庭提出的相關上訴，請參閲CACC415/2013。