香港特別行政區 訴 林樂曦

HCCC429/2011

香港特別行政區

高等法院

原訟法庭

刑事案件2011年第429號

----------------

----------------

主審法官：　　高等法院法官潘敏琦

日期：　　　　2012年7月16日上午9時52分

控罪：　　　　販運危險藥物（Trafficking in a dangerous drug）

----------------------

以下內容乃法庭數碼錄音謄本
判刑

----------------------

官：　

被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，警員睇到被告與另一人匆忙登上的士，形跡可疑，警員追截，截停的士之後發現被告嘅斜孭袋內有毒品，以及一批可再封口膠袋，被告人承認替人運送該些毒品。毒品經過化驗之後證實為240克嘅粉末，內含190克嘅氯胺酮，而毒品數量當時嘅零售價係港幣25,440元。

被告現在17歲，曾經有兩項嘅刑事紀錄，都係管有危險藥物，被判感化令，後來因為喺感化期間違反宵禁令，導致感化令需要延長，但係本案係喺延長咗感化令之後兩個月發生，即係佢干犯本案違反咗延長嘅感化令。

大律師喺求情嘅時候表示，被告干犯本案嘅時候只得十六歲半，而佢來自一個破碎嘅家庭，交由母親照顧，早年過住顛沛流離嘅生活。後來10歲之後重返與母親同住，但係後來因為誤交損友，所以染上毒癮。喺被判感化令之後，父親再度照顧佢，判咗佢去福音戒毒，但係唔夠兩個月嘅時間佢已經感覺不適應偷偷離開，再搵番損友，經不起損友唆擺，然後跟住先至干犯本案，佢對於今次干犯本案深感後悔，第一時間認罪，彰顯悔意。大律師指，被告希望喺牢獄生涯期間繼續學業，希望出獄之後可以回饋社會。大律師亦都希望本席能夠考慮佢家人對佢不離不棄嘅支持，以及佢年紀尚輕，寬大處理佢嘅判刑。

本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱讀咗被告自己所寫以及四封其他人為佢寫嘅求情信。根據許守城案件嘅量刑指引，販運50至到300克嘅氯胺酮，起刑點係6年至到9年。就本案所牽涉190克嘅氯胺酮，本席採納8年嘅起刑點，予以三分之一嘅認罪扣減，判刑64個月，即係五年零四個月。