被告人你喺裁判法院承認一項販運危險藥物罪，被交付高等法院原訟法庭判處。今日你喺本席席前確認你承認控罪，亦都承認案情，本席確定你罪名成立。
喺考慮判處嘅時候，本席顧及咗整體情況，包括案件嘅性質同埋情節，尤其是涉案嘅危險藥物嘅性質同埋份量，你嘅個人背景與及你嘅辯護大律師嘅求情陳詞。
本案嘅案情係簡單嘅，喺案發當日下晝大約9點40分，你喺街上面被警員截停，當時你攞住一個紙袋，袋裡面有內含282.33克可卡因嘅共360.47克嘅固體同埋內含20.88克可卡因嘅29.99克粉末。
當你被拘捕之後，喺警誡下你承認喺度幫人帶涉案嘅可卡因到旺角交給其他人。
喺之後嘅一次會面裡面，你承認你依照他人嘅吩咐，喺一間酒樓嘅男廁裡面攞到有關嘅毒品。經過點算之後，準備將毒品分別送給兩個人，途中你被警察截停。據你了解，你每次運送一包危險藥物可以得到200元嘅酬勞，不過你從來未就販毒收到任何嘅報酬。
法庭得知你現時28歲，讀書至到中學二年級，之後投身社會，曾經任職理貨員同埋廚師，最後嘅職位收入有每個月13,500元。喺被捕嘅時候你係無業嘅，父親已經去世多年，你同埋你嘅姐姐由母親獨力撫養，姐姐而家已經結婚，你同母親一齊住喺一個公屋單位。
你並非係初犯嘅，2004年當時你20歲，因為三項搶劫罪被判接受感化。後嚟因為違反感化令被判處進入更生中心接受培訓。
從判處嚟判斷，呢一啲控罪所涉嘅案件嘅性質同埋情節看來並非係嚴重嘅，你從來未干犯過涉及危險藥物嘅罪行。
你嘅大律師喺替你求情嘅時候向法庭提出，你一向勤力工作，只係因為極大嘅經濟壓力，而且被上司陷害失去工作先至會鋌而走險。你有一位固定嘅女朋友，但係佢患有精神病，所以無法工作。喺案發前你嘅女朋友臨盆在即，極需要金錢去撫養你即將出生嘅女兒，你並冇咩嘢積蓄，就向屢次向你借錢但係未償還嘅上司追債，但係反為被誣害，最後被辭退，呢個係你犯案之前數天所發生嘅。喺重大經濟壓力之下，你經唔起朋友嘅唆使走上販毒之途。
當你有工作嘅時候，你每個月會畀母親3,000元幫補家計。
你嘅辯護大律師強調，你一被拘捕之後就坦白招認，喺裁判法院嘅時候亦都盡早承認控罪。
因為案件嘅性質同埋情節都十分嚴重，所以監禁係唯一合適嘅判處。判處一個具有阻嚇性嘅刑罰喺呢一類型嘅案件係必須嘅。你販運嘅危險藥物係可卡因，根據AG v Chang Chen Liu Sa（[1995] 1 HKCLR 69）呢一宗案例，法庭喺判處嘅時候應該考慮英皇訴劉德明（[1990] 2 HKLR 370）一案裡面所提出嘅量刑指引。
你今次販運嘅毒品係總份量303.21克嘅可卡因，根據劉德明一案，如果販運嘅海洛英份量介乎200克至400克嘅話，法庭應該考慮採用一個12至15年嘅量刑起點。考慮咗本案嘅整體情況，本席睇唔到有咩嘢理由要偏離上述嘅量刑指引，本席認為一個13年嘅量刑起點係合適嘅，可以充份反映本案嘅性質同埋情節。
因為你承認控罪，應該得到三分一嘅刑期扣減；此外，顧及辯方大律師陳詞時所說，本席酌量給予你多一啲嘅刑期扣減。
被告人，請起立，基於上述理由，本席判你監禁八年半。