被告人，你先前喺裁判法院承認咗一項販運危險藥物罪。喺2012年11月23號，你喺本席席前確認咗你承認控罪，並且同意案情，本席確定你罪名成立。
本席喺判處嘅時候考慮咗整體情況，包括案件嘅性質同埋情節、你嘅個人背景同埋辯方大律師為你所作出嘅求情陳詞。
本案嘅案情可以簡述如下，喺2012年3月22日，海關人員喺羅湖管制站海關大堂截停咗你，喺搜身嘅時候，喺你嘅內褲發現咗兩包物品，物品後嚟被確定為可卡因同埋俗稱「冰毒」嘅甲基苯丙胺鹽酸鹽。份量為內含32.52克嘅可卡因固體同埋內含64.64克嘅「冰毒」嘅66.44克晶狀固體。
喺被捕之後，喺警誡之下，你否認上述物品係你嘅，你話你唔知道嗰啲係乜嘢嘢。喺後嚟嘅錄影會面嘅時候，你依然否認，並且指稱海關人員試圖將一包物品放入你嘅內褲。
你現年36歲，中三程度，輟學之後喺家人經營嘅成衣生意工作，後嚟轉做跟車工人同埋其他兼職，之後到內地發展同埋居住。你並非係初犯嘅，不過除咗喺1996年同埋1998年曾經干犯管有危險藥物罪之外，其餘嘅罪行大部分都係同駕駛有關，亦都曾經兩次干犯阻差辦公那類型嘅罪行。
你嘅辯護大律師強調你喺2003年之後已經冇再犯事，喺2005年結咗婚，決心洗心革面。佢亦都指出，你今次犯事係基於一個特別嘅情況，本席被告知喺數年前你同妻子嘅關係唔好，你喺沉重嘅精神壓力之下決定離開香港，喺珠海開設咗一間服裝店，亦都喺珠海居住。期間你認識咗一名女士，亦都同妻子協議，打算分居之後就申請離婚。後嚟因為商店嘅租金太高，你結束咗服裝店，同嗰名女子到咗深圳居住，你視該名女子為未婚妻。
喺深圳，你向一名朋友借咗數千元，之後嗰個人帶咗其他人前嚟追債，你因為冇錢還，被打至頭破血流，之後對方更要你還兩萬鈫，否則就會對你嘅未婚妻不利。喺還錢期限到咗嘅時候，你冇辦法還錢，被對方威逼利誘為佢哋帶毒品嚟抵債，你不肯就範。雖然後嚟未婚妻借咗10,000鈫還債，對方亦都唔放過你，再次毆打你，威逼你喺內地境內為佢哋送貨，你喺不情願之下幫佢哋做事。之後你嘅未婚妻已經遷居，對方唔能夠再以佢嚟威逼你，但係佢哋脅持咗你三日，到咗案發當日，強行將毒品放咗喺你身上，將你押至羅湖關口，要你將毒品帶嚟香港。你喺過關嘅時候，被關員帶去搜查房，毒品被搜出。
本席得知情況，提出了以下兩點，第一，你嘅講法會否構成脅逼呢個辯解理由，因而會令到認罪嘅答辯成為不明確嘅答辯；第二，法庭未必會單憑你嘅信件嘅內容同埋代表你嘅大律師嘅陳詞，就接納你呢一方面嘅講法。為此，聆訊押後去到2012年11月26號，喺嗰日嘅聆訊，你嘅大律師告知法庭，佢已經同你解釋咗情況，亦都聽取咗進一步嘅指示。佢指出，喺你被脅持嘅三日之內，並冇特別嘅事情發生，亦都冇再涉及你嘅未婚妻。喺案發日，嗰啲人雖然強行將毒品放喺你身上，將你帶到關口，但係你只係單獨一個人過關，冇再被人脅持，當時你只係自己胡思亂想，擔心未婚妻而已，並冇覺得被脅逼。本席亦都親自向你確定情況是否如此，你當時表示同意，亦都同意將你嘅信件裡面第4頁第二行「強逼」兩個字修改為「要」，為咗表示當時已經冇強逼嘅成份。
辯方律師明確告知法庭，你並不倚賴脅逼作為辯解，而曾經發生嘅事情，喺事實上同埋法律上都不構成脅逼。控方表示，喺咁嘅情況之下，接受認罪答辯係穩妥嘅，本席同意呢個睇法。
你亦都表示你不會就求情出庭作證，亦都不會傳召證人。喺咁嘅情況之下，本席考慮咗你嘅講法，認為你喺過關時嘅行為同埋被揭發帶毒之後嘅反應，與你嘅講法一啲都不相符，因此不信納你喺信中同埋透過辯方大律師向法庭描述嘅犯罪背景。本席不信納你呢個講法同本席接受你嘅定罪答辯無關，嗰個決定主要建基於你明確指出你喺帶毒過關嘅時候，沒有被脅逼嘅感覺，整體情況亦都不符以脅逼作為抗辯理由嘅條件。本席不信納你就犯案背景嘅講法，只係同考慮判處有關。
本案涉及兩種危險藥物，一種係「冰毒」，一種係可卡因，兩種危險藥物對社會同埋個人嘅禍害都係嚴重嘅，其中以「冰毒」為甚。根據案例AG v 程國雄（[1991] 2 HKLR），販運「冰毒」者，如果毒品純含量係10至70克嘅時候，應該考慮判處監禁7至10年，如果純含量係70至300克嘅時候，應該考慮判處監禁10至14年。
至於販運可卡因，應該參照販運海洛英嘅案件嘅量刑指引作出判處。根據英皇訴劉德明（[1990] 2 HKLR 370），販運海洛英，如果毒品嘅純含量係10至50克嘅時候，應該考慮嘅刑期係5至8年。
以本案嘅情況，本席認為採用綜合判處方式（即係combined approach）係恰當嘅。此外，因為案件涉及將危險藥物由內地帶嚟香港，量刑基準應該提高半年。
考慮咗整體情況之後，本席認為應該採用十一年三個月作為量刑基準。你承認控罪，應該得到三分一嘅刑期扣減，除此之外，辯方大律師力陳你現在已經有真誠悔意，並且報讀咗公開大學一個課程，希望能夠充實自己，喺服刑期滿之後可以重新做人。顧及案例所述，喺承認控罪嘅時候給予三分一刑期扣減所包括嘅考慮因素，本席認為三分一嘅刑期扣減係你喺本案應得嘅刑期扣減幅度。
基於上述理由，本席判處你就本案監禁七年半。