香港特別行政區 訴 鍾綿衡

HCCC 273/2012

香港特別行政區

高等法院

原訟法庭

刑事案件2012年第273號

----------------

----------------------

判刑

以下內容乃法庭數碼錄音謄本

----------------------

官：　

被告係被控一項販運危險藥物罪，涉及嘅係0.96公斤嘅「冰」毒，被告承認控罪就同埋同意有關嘅案情。

咁個控方嘅案情其實就好簡單嘅啫，就係話被告喺2012年2月23日上午嘅時間，去到香港呢個國際機場就準備出境去日本旅行，佢係參加咗一個旅行團，咁當海關關員截停被告及搜到佢行李匧時，就發現裡面係有暗隔同埋藏咗控罪所指嘅「冰」毒，因此就拘捕被告。咁被告亦都係即時承認嗰啲係「冰」毒嚟嘅，呢一批數量嘅毒品零售價係大約為港幣嘅八十萬鈫。

被告今年44歲，香港居民，佢冇刑事紀錄，已婚，但係就同妻子係分開咗喇。

代表被告人嘅關大律師喺求情嘅時候就指出，被告人因為經濟問題先係做呢個帶水貨嘅工作，之後就受人唆擺就犯咗呢個販運毒品罪，被告現時已經係有悔意。

喺判刑嘅時候，本席需要係根據呢個案例程國雄嘅指示去考慮，咁另一方面，本席注意到就係呢一次嘅事件係肯定涉及運送毒品去其他國家㗎喇，而且呢次行動必然係有小心計劃同埋安排嘅。呢一個好明顯就唔係一個一時衝動嘅做法。喺咁嘅情況之下，本席認為上訴庭喺黎勇毅一案嘅觀點係適用於本案嘅，尤其係判詞嘅第15段裡面嘅評論。再者，呢一類犯罪手法，近年來法庭都睇到係頗為普遍，咁樣嘅情況絕對係打撃咗香港嘅聲譽嘅。

但係本席接納，其他被告喺辯護時針對呢個被告所講嘅事情，本席喺判刑嘅時候係不應考慮嘅。

經考慮後，本席決定以21年作為刑期嘅起點，本席認為應該給予被告全數三分一嘅扣減，但係除此之外，本席睇唔到有其他有效嘅求情因素。因此，刑期係14年。