被告人，你喺裁判法院承認咗兩項販運危險藥物罪，被交付高等法院原訟法庭判處。今日你喺本席席前再次承認控罪、同意案情，本席確認你兩項控罪都罪名成立。
本席喺判處嘅時候，考慮咗整體情況，包括案件嘅性質同埋情節、你嘅個人背景同埋你嘅辯護大律師為你作出嘅求情陳詞。
本案嘅案情可以簡述如下。2012年8月25日早上喺旺角，你從一輛停泊咗嘅私家車落車，車上面冇其他人，你手上面攞住一個膠袋，匆匆咁樣走向快富街。警員將你截停，喺搜查之後，發現你手上嘅膠袋裡面有用報紙包住嘅三個膠袋，呢一啲膠袋裡面有混合劑，於是拘捕咗你。喺警誡之下，你對警員講，你幫人運送嗰啲危險藥物，賺取3,000元嘅報酬。警員後嚟喺涉案嘅車輛嘅司機座位下面，發現咗三百一十二包混合劑，警員再次將你拘捕，警誡之下，你對警員講，嗰啲物品係你較早時表示運送畀人嘅危險藥物。
喺之後嘅一次會面裡面，你承認咗以下嘅事情，係一個叫做「光頭」嘅人叫你運送被撿獲嘅危險藥物。喺案發前早一日嘅晚上，「光頭」用電話話畀你聽，去涉案車輛停泊嘅停車場攞嗰啲涉案嘅毒品，喺案發日，你從內地嚟到香港，喺停車場攞到嗰啲涉案毒品，然後打算分別送去快富街同埋朗豪坊。涉案嘅車輛係你嘅弟弟嘅，你借咗嚟用。你手上膠袋裡面，後嚟被證實為內含36.99克嘅海洛英鹽酸鹽嘅83.61克混合劑，喺車上面發現嘅，後嚟被證實為內含61.78克嘅海洛英鹽酸鹽嘅124.09克混合劑。
我得知你現年53歲，已婚，同妻子與及一個3歲嘅兒子喺深圳居住。你小二學業程度，曾經當過漁夫同埋任職司機，現時喺內地做漁獲嘅買手。你並非係初犯，但係案底同危險藥物無關，罪行亦都已經係多年之前干犯，喺1984年，你因為一項串謀出口違禁品嘅控罪，被判監禁3個月，呢一項定罪紀錄唔會影響今次嘅判決。
你嘅辯護大律師向法庭呈遞咗你嘅親筆信件，同埋你妻子為你撰寫嘅求情信件，並且為你告知法庭，你之干犯本案，主要係因為經濟嘅壓力。你之前曾經結過兩次婚，妻子都係因為經濟狀況唔好而下堂求去。你學歷不高，所以好難搵到理想嘅職業，為咗妻子同埋兒子可以過好啲嘅生活，一時糊塗，鋌而走險，干犯咗本案。你現在已經深感後悔，妻子依然對你有十足嘅支持。
你今次販運嘅係海洛英，第一控罪關乎你手上面，膠袋裡面嘅毒品，毒品純含量係36.99克海洛英；第二控罪關乎私家車裡面嘅毒品，毒品純含量係61.78克海洛英。根據上訴庭嘅案例英皇訴劉德明（[1990] 2 HKLR 370），販運海洛英者，如果毒品嘅份量係10至50克嘅話，應該判處監禁5至8年；如果毒品份量係50克至200克嘅話，應該判處監禁8至12年。本席睇唔到喺本案存在應該偏離量刑指引嘅因素。
考慮咗整體情況，本席會採用以下嘅量刑基準。第一控罪，六年九個月；第二控罪，八年三個月。你承認控罪，應該得到三分一嘅刑期扣減，考慮咗整體情況，本席認為呢個就係你應得嘅刑期扣減幅度。
被告人，請起立。基於上述理由，本席判你第一控罪監禁四年半，第二控罪監禁五年半。考慮咗整體量刑，尤其係兩批毒品嘅總份量，本席認為一個六年三個月嘅最終總刑期係合適嘅，足以反映案件嘅嚴重程度，因此本席命令，第二控罪嘅刑期其中21個月，同第一控罪嘅刑期分期執行，因此你為兩項控罪，總共監禁六年三個月。