香港特別行政區 訴 佘俊濠

DCCC 548/2013

香港特別行政區

區域法院

刑事案件2013年第548號

----------------

----------------

----------------

判刑理由書

----------------

1.被告承認一項販運危險藥物罪，違反香港法例第134章《危險藥物條例》第4（1）（a）及（3）條。罪行詳情指被告喺2013年3月16日喺香港九龍油麻地上海街一間夜店內販運危險藥物，即內含9.18克可卡因嘅11.27克固體。

2.案情方面，喺事發當日，警方在涉案嘅夜店進行查牌活動，期間被告見警員嚟到，意欲逃跑，被告與警員掙扎期間，將一個塑料袋拋向地下，該塑料袋後來發現內藏有八小包嘅毒品，即係本案部分嘅可卡因。被告被制服之後，警員喺被告身上搵上另一個塑料袋，裡面藏有三十六小包嘅可卡因，而經化驗之後，兩批可卡因嘅數量係合共11.27克嘅固體，裡面有9.18克嘅可卡因嘅。被捕嘅時候，被告身上面係有13,244.40元，而根據警方嘅估計，涉案嘅可卡因總值係13,026鈫。

3.關於被告嘅背景，被告現年31歲，未婚，有五次刑事紀錄，但係都同毒品冇關係。被告報稱係一個運輸工人，月入大概5,000鈫。另外佢亦都向警方承認佢喺涉案嘅夜店裡面係當兼職嘅，但係收入不詳。

4.求情嘅時候鄧律師向被告指出，被告係一個孝順嘅兒子，而佢亦都係有協助照顧佢嘅姪仔、姪女。鄧律師亦都向本席提供由被告家人，包括佢嘅母親、姪仔、姪女同埋僱主等所寫嘅求情信，與及姪仔、姪女嘅一啲顯示佢哋學業成績優良嘅證書。根據鄧律師所講，呢啲孩子成績優良，部分嘅原因係因為被告係有抽時間幫佢哋一齊讀書。鄧大律師求情嘅時候亦都聲稱涉案嘅毒品部分係被告自用，但係本席唔接受呢一個講法，原因係因為被告報稱嘅收入，涉案毒品嘅估計價值、被告被捕時身上面藏有嘅現金、毒品包裝嘅方法同埋分開包裝係牽涉到係數十包嘅小包嘅毒品，與及被告被捕嘅場所。

5.關於量刑方面，冇爭議嘅係根據AG v Rojas（[1994] 1 HKC 342），上訴庭嘅判例適用於販運海洛英嘅判刑指引，亦都適用於販運可卡因。而根據女皇訴劉德明（[1990] 2 HKLR 387）販運10克以下嘅毒品，判刑指引係二至五年監禁。

6.考慮咗本案被告人所有嘅求情因素，亦都考慮到毒品嘅數量，本席認為適當嘅刑期起點係51個月，但因為被告認罪，本席給予三分之一嘅量刑扣減，所以得出嘅刑期最後係34個月。除此之外，本席睇唔到有其他有力嘅求情原因，所以本席判處被告34個月嘅監禁。