被告喺聆訊之後被裁定兩項強姦罪，罪名成立。
被告人係受害人X媽媽當時嘅同居男朋友，兩項控罪嘅定罪基礎係被告喺X讀小五同埋中一嘅時候強姦佢，雖然X嘅證供聲稱佢總共被侵犯咗三十幾次，但係由於被告現在只係就兩項強姦罪被判刑，本席並不會將X聲稱其他控罪以外嘅情況作為量刑嘅考慮。但係本案有以下令案情情節嚴重嘅因素：
第一，受害人口口聲聲係聲稱被告做爸爸，被告絕對屬於可以支配、牽制同埋影響受害人嘅一方，被告喺受害人年幼無知嘅時候濫用自己嘅身分侵犯佢，奪去佢嘅貞操，行為嚴重違反誠信。
第二，有關嘅強姦罪行唔係單一嘅事故，被告現在被定罪係兩次嘅罪行，分別係發生喺受害人11同埋13歲嘅時候。
第三，公眾對呢一類案件嘅不恥以及憎厭。
第四，根據受害人嘅證供，佢為咗維持家庭嘅完整性，又唔想啲細佬妹好似佢咁冇咗爸爸，用心良苦，先至啞忍被被告性侵犯，佢向媽媽嘅投訴媽媽都置若罔聞，視若無睹，幸得男友勸籲同埋鼓勵，並且要喺阿姨嘅陪同之下先至敢挺身而出，本席唔使傳召受害人嘅心理創傷報告都可以毫無疑問，受害人所背負嘅壓力同埋身心所受到嘅煎熬實不為外人道，呢啲事件對佢嘅負面影響，肯定至為深遠。
第五，喺呢一、兩次嘅性行為，被告並冇使用安全措施。
根據被告嘅案底以及認識口供，被告現年49歲，由1989年開始，已經有多次嘅案底，包括使用虛假文件、盜竊以及賭博嘅案底。
被告，起身，你口口聲聲話好啲細路，作供嘅時候又話個仔皮膚敏感，你就日日煲水佢沖涼，又話夜晚黑要同啲細路冚被，又同個細女食早餐，滿口溫情，但係事實上就厚此薄彼。麥女士同前度嘅女X想買筆盒、書包都冇，舊書包爛咗就要補番用，唔單係咁，仲要淪為你嘅洩慾工具。不單如此，你對事件冇承擔、冇悔意，喺被捕、喺會面嘅時候反過嚟，不實地指控一個只得13歲，體重唔夠一百磅嘅受害人，你要話佢夾住你雙腳，主動嚟同你發生性行為，為嘅係乜嘢？只係為咗要求去街啫，你嘅講法簡直強詞奪理，顛倒是非，指鹿為馬，意圖擾亂視聽。X喺經過一番掙扎之後，除咗需要挺身而出舉報你，更加需要嚟到法庭重溫慘痛嘅經歷，並且就住你所指話佢無中生有、虛構故事嘅指供作出回應。你嘅行為係極度自私、卑劣以及無恥嘅，如果話你係禽獸，就係侮辱咗啲禽獸。
就住控罪一同埋控罪三，本席認為8年嘅起刑點係合適嘅，聆訊之後被定罪，不獲任何扣減。就你整體嘅罪行，一個整體性10年嘅刑期係合適嘅，所以下令第三項控罪中嘅兩年同第一項控罪嘅刑期分期執行，總刑期10年。